ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde student-jaslar Nókis Jaslar texnoparkiniń qánigeleri menen ushırastı

Usı jıldıń 13-sentyabr kúni Ájiniyaz atındaǵı Nókis mámleketlik pedagogikalıq institutınıń kishi májilisler zalında Nókis Jaslar texnoparkiniń mentorı, «InnoX» biznes inkubaciyasınıń baslıǵı Erlan Kereev penen student-jaslardıń ushırasıwı bolıp ótti.

Ilajdı instituttıń ilimiy isler hám innovaciyalar boyınsha prorektorı R.Eshmuratov ashıp berdi jáne basqarıp bardı.

Ushırasıw dawamında studentler Jaslar texnoparkinde jaratılǵan múmkinshilikler, Innovaciyalıq rawajlanıw agentligi tárepinen járiyalanǵan tańlawlardıń shártleri hám búgingi kúnge shekem grant jeńip alǵan jaslar haqqında tolıq maǵlıwmatqa iye boldı.

Sonday-aq, qánigeler studentler tárepinen berilgen hár túrli startap joybarlar haqqındaǵı sorawlarǵa keńnen toqtalıp ótti. Ushırasıw sońında soraw-juwaplarǵa belsene qatnasıp otırǵan jaslar Texnopark aǵzalıǵına qabıl etildi.

Bunnan soń, instituttıń bólim baslıǵı Q.Tashanov tárepinen «Inno Week» innovaciyalıq ideyalar hám joybarlar hápteligi sheńberinde bolıp ótetuǵın tańlaw hám kórgizbeler haqqında maǵlıwmat berildi.

Atap ótiliwinshe, háptelik ilajlarında qatnasıwdı qáleytuǵın studentler usı jıldıń 20-sentyabr kúnine shekem NMPI Ziyrek studentlerdiń ilimiy-izertlew jumısların shólkemlestiriw bólimine múrájat etiwi kerek.

Bekbergen Ádilbaev,

NMPI Fizika-matematika fakultetiniń studenti.