ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Tariyx fakultetinde ata-analar forumı hám ashıq esikler kúni bolıp ótti

Búgin, 15-sentyabr kúni Ájiniyaz atındaǵı Nókis mámleketlik pedagogikalıq institutınıń Tariyx fakultetinde ata-analar forumı hám ashıq esikler kúni ilajı bolıp ótti.

Ilaj dáslep studentlerdiń ata-anaları qatnasıwında fakultet quramında jumıs alıp barıp atırǵan Jámiyetlik pánler, Milliy ideya, ruwxıylıq tiykarları hám huqıq tálimi, Tariyxtı oqıtıw metodikası, sonday-aq, Geografiyanı oqıtıw metodikası kafedralarınıń ilimiy-pedagogikalıq jumısları, qolǵa kirgizilgen nátiyjelerin sáwlelendirgen kórgizbe menen baslandı.

Bunnan soń fakultet dekanı M.Sarıbaev, sonıń menen birge, kafedralardıń baslıqları qatnasıwında ata-analar menen sáwbetlesiwler ótkerildi.

M.Sarıbaev bunday ushırasıwdı shólkemlestiriwden baslı maqset keleshek áwlad tárbiyasında óziniń qádiriyatları hám 90 jılǵa shamalas tariyxına iye bolǵan Nókis mámleketlik pedagogikalıq institutında oqıw, ilimiy-izertlew jumısların alıp barıw, dóretiwshilik qábiletin arttırıw, tájiriybeli pedagoglar, professor-oqıtıwshılar menen «ustaz-shákirt» principi tiykarında jumıs islew baǵdarında jaratılǵan sharayatlar, ámelge asırılıp atırǵan jumıslar menen jaqınnan tanıstırıw menen birge, studentlerdiń ata-anaları menen jaslar tárbiyasında orın alıp atırǵan máselelerdi birgelikte dodalaw, mashqalalarına sheshim tabıw, ata-analardıń tálim-tárbiya máselesindegi múrájatları, pikir-usınısların úyreniwden ibarat ekenligin ayrıqsha atap ótti.

Búgingi kúnde Tariyx fakultetinde 758 student oqıp bilim almaqta. Olarǵa 6 ilim doktorı, 18 ilim kandidatı, 19 úlken oqıtıwshı hám 39 assistent-oqıtıwshıdan ibarat tájiriybeli professor-oqıtıwshılar óz baǵdarları boyınsha bilim berip kelmekte. Sońǵı jıllarda professor-oqıtıwshılar tárepinen 15 monografiya, 10 ǵa shamalas sabaqlıq, 60 tan aslam oqıw hám oqıw-metodikalıq qollanbalar baspadan shıǵarıldı.

Fakultette ziyrek studentlerden dúzilgen «Jas huqıqtanıwshı», «Jas mánawiyatshı», «Jas geograf», «Jas tariyxshı», «Jas filosof» sıyaqlı birneshe dógerekler jumıs alıp barmaqta.

Ilimiy-pedagogikalıq jumıslarǵa student-jaslardı qamtıp alıw jumıslarınıń jaqsı jolǵa qoyılǵanlıǵı sebepli sońǵı jıllarda fakultet studentleri arasınan Ájiniyaz Qosıbay ulı atındaǵı 2, Nawayı atındaǵı 3 hám Islam Kárimov atındaǵı 2 stipendiat jetisip shıqtı.

Fakultet studentleri «Tafakkur sinovlari», «Zakovat» hám usı sıyaqlı tańlawlarda Ózbekstan Respublikası kóleminde ótkerilgen basqıshlarda birneshe márte jeńimpazlıqtı qolǵa kirgizip kelmekte.

Ushırasıwlar dawamında oqıwda hám jámiyetlik jumıslarda belsendilik kórsetip kiyatırǵan bir topar studentlerdiń ata-analarına minnetdarshılıq xatları tapsırıldı.

Óz gezeginde, ushırasıwǵa kelgen ata-analar da shıǵıp sóylep, jaslardıń tálim-tárbiyasında ayanbay miynet etip atırǵan hám usınday sharayatlardı jaratıp bergen institut hám fakultet jámáátine tereń minnetdarshılıqların bildirdi.

Ushırasıwlarda ata-analarǵa oqıtıwdıń kredit-modul sisteması, ijarada jasaytuǵın studentlerdiń ijara shártnamaları hám olarǵa tólenip atırǵan tólemler, studentler keńesi belsendileri ushın berilip atırǵan qosımsha stipendiyalar haqqında da tolıq maǵlıwmatlar berildi.