ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Institut studentleri arasında úgit-násiyat jumısları alıp barıldı

Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Joqarǵı Keńesi tárepinen shólkemlestirilgen úgit-násiyat jumısları boyınsha arnawlı toparı aǵzaları menen student-jaslardıń ushırasıwı bolıp ótti.

Ilajǵa Joqarı bilimlendiriw, ilim hám innovaciyalar ministrligi Qaraqalpaqstan Respublikası aymaqlıq basqarmasınıń baslıǵı N.Kayupov, Berdaq atındaǵı Qaraqalpaq mámleketlik universiteti yarım ótkizgishler fizikası kafedrasınıń baslıǵı, fizika-matematika ilimleriniń doktorı, professor Q.Ismayılov, Qaraqalpaqstan Respublikası Ádillik ministrligi advokatura, notariat hám huqıqıy xızmetler bólimi bas másláhátshisi Á.Ótewliev, sonday-aq, Ózbekstan Respublikası Ministrler Kabineti janındaǵı «Shańaraq» ilimiy-ámeliy izertlew orayı Qaraqalpaqstan Respublikası basqarmasınıń baslıǵı, psixologiya ilimleriniń doktorı, docent M.Ótepbergenov qatnastı.

Ushırasıwda sózge shıqqan taraw wákilleri búgingi kúnde elimizde jaslardıń bilim alıwı, kásip-óner úyreniwi, isbilermenlik penen shuǵıllanıwı hám basqa da tarawlar boyınsha óz qábiletlerin jetilistirip barıwı ushın mámleketimiz tárepinen jaratılıp atırǵan imkaniyatlar haqqında keń túrde maǵlıwmatlar berdi.

Ásirese, sońǵı jıllarda Qaraqalpaqstan Respublikasın kompleksli rawajlandırıw maqsetinde ámelge asırılıp atırǵan reformalardıń ámeliy nátiyjeleri hár bir jerlesimizdiń turmısında óz kórinisin tawıp atırǵanlıǵı anıq mısallar menen kórsetip ótildi.

Sonıń menen birge, jaslardıń huqıqıy sawatlılıǵı, mádeniyatın arttırıw, olardı ilimiy-izertlew jumıslarına baǵdarlaw, baslamaların qollap-quwatlaw baǵdarında islenip atırǵan jumıslardıń áhmiyeti túsindirildi.

Ilajda studentler qánigeler menen sáwbetlesip, ózlerin qızıqtırǵan sorawlarına juwap aldı.

NMPI baspasóz xızmeti.