Ájiniyaz atındaǵı Nókis mámleketlik pedagogikalıq institutınıń Korrupciyaǵa qarsı gúresiw «Komplaens-qadaǵalaw» sistemasın basqarıw bóliminiń baslaması menen Pedagogika, Baslawısh tálim hám Shet tilleri fakultetlerinde hár fakultette óz aldına 1-kurs studentleri qatnasıwında «Biz – korrupciyaǵa qarsımız!» atamasında úgit-násiyat ilajları bolıp ótti.

Ótkerilgen ilajlarda bólim baslıǵı P.Xojabekov korrupciyaǵa qarsı gúresiwge baylanıslı normativ-huqıqıy hújjetler, pármanlar hám qararlar haqqında student-jaslarǵa maǵlıwmatlar berdi. Bólimniń islep atırǵan jumısları haqqında aytıp, Telegram tarmaǵındaǵı rásmiy bot hám isenim telefonları menen tanıstırdı, sonday-aq, bul boyınsha hár bir student úgit-násiyat alıp barıwı kerekligi haqqında kórsetpeler berdi.

Studentlerge institutta «9-dekabr – Xalıqaralıq korrupciyaǵa qarsı gúresiw kúni»ne baǵıshlap ótkeriletuǵın tańlawlarǵa, ilajlarǵa házirden baslap puqta tayarlıq kóriw hám ótken jılǵı tańlaw nátiyjeleri boyınsha fakultetlerdiń jetiskenlikleri haqqında maǵlıwmatlar berdi.

Jaslardı korrupciyaǵa qarsı birgelikte gúresiwge, jámiyetlik qadaǵalawdı ámelge asırıwǵa shaqırdı. Sonıń menen birge, bólimniń «Korrupciyaǵa qarsı gúresiw student-jaslar klubı» haqqında aytıp, studentlerdi aǵza bolıwǵa shaqırdı.

Ótkerilgen úgit-násiyat ilajlarında studentler ózlerin qızıqırǵan sorawlarǵa juwaplar aldı.