ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Ózbek tili bayramı kúnine baǵıshlanǵan konferenciya hám bayram koncerti bolıp ótti

21-oktyabr – Ózbek tili bayramı kúni. Bıyıl ózbek tiline mámleketlik til biyliginiń berilgenine 34 jıl tolmaqta. Sáne múnásibeti menen Ájiniyaz atındaǵı Nókis mámleketlik pedagogikalıq institutı Túrkiy tiller fakulteti ózbek tili kafedrası tárepinen «Ana tilim – maqtanıshım!» atamasında ilimiy-ámeliy konferenciya hám bayram koncerti shólkemlestirildi.

Konferenciyanı fakultet dekanı B.Davletov ashıp berdi hám basqarıp bardı.

Ilajǵa belgili filolog ilimpazlar, professor-oqıtıwshılar, tyutorlar, student-jaslar, keń jámiyetshilik hám ǵalaba xabar quralları wákilleri qatnastı.

Konferenciyada Ózbekstan Jazıwshılar awqamınıń aǵzası, «Qoraqalpog‘iston tongi» gazetasınıń bas redaktorı N.Matyakubova, filologiya ilimleriniń doktorı, ózbek tili kafedrasınıń professorı G.Qurbaniyazov, qaraqalpaq tili kafedrasınıń docenti S.Shınnazarova, Qaraqalpaqstan Jazıwshılar awqamınıń aǵzası, belgili nawayıtanıwshı shayır Á.Ótepbergenov, ózbek tili kafedrasınıń docenti A.Sultanovalar sózge shıǵıpilaj qatnasıwshıların bayram menen qutlıqladı hám bayanatların oqıp berdi.

Bunnan sarras 34 jıl burın, yaǵnıy 1989-jılı 21-oktyabr kúni «Mámleketlik til haqqında»ǵı nızam qabıl etilip, ózbek tiline mámleketlik til biyligi berilgen edi.

2019-jıldan berli Ózbekstan Respublikası Prezidentiniń «Ózbek tiliniń mámleketlik til sıpatındaǵı abıroyı hám mártebesin túp-tiykarınan arttırıw ilajları haqqında»ǵı pármanına muwapıq, respublikamızda 21-oktyabr – Ózbek tili bayramı kúni sıpatında keń túrde belgilenip kelinbekte.

Ózbekstan Respublikası Prezidenti Shavkat Mirziyoevtiń xalqımızǵa bayram qutlıqlawında keltirip ótkenindey, sońǵı jıllarda elimizde ózbek tilin rawajlandırıw, onıń turmısımızdaǵı ornı hám tásirin arttırıw boyınsha jańa basqısh baslandı.

Atap aytqanda, 21-oktyabr – Ózbek tili bayramı kúni dep belgilengeni umıtılmas, tariyxıy waqıyaǵa aylandı. Mámleketlik tildiń abıroyı hám mártebesin arttırıwǵa baǵdarlanǵan párman hám qararlar, normativlik hújjetler qabıl etildi. Bul baǵdarda 2020-2030-jıllarǵa mólsherlengen koncepciya hám ayrıqsha baǵdarlama turmısqa engizilmekte.

Qısqa waqıttıń ishinde bes tomlıq «Ózbek tiliniń túsindirme sózligi», onnan aslam tarawǵa baylanıslı terminler sózlikleri, otız tomlıq «Ǵárezsizlik dáwiri ózbek nawayıtanıwshılıǵı» izertlewler kompleksi jaratıldı.

Ózbek tilinde «Túrkiy ádebiyat dúrdanaları» atamasındaǵı júz tomlıq kólemli toplam baspadan shıqqanlıǵı, belsendi hám qábiletli jaslarımızdıń háreketleri menen Internet tarmaǵındaǵı ózbekshe maǵlıwmatlardıń elektron bazası bayıtılıp atırǵanlıǵın atap ótiw orınlı.

Konferenciyada bayanatshılar hám sózge shıǵıwshılar tárepinen ózbek tiliniń dúnya tilleri arasındaǵı abıroyın arttırıw, elimizde mámleketlik til sıpatındaǵı mártebesin, qollanılıwın bunnan bılay da jetilistiriw, filologiya baǵdarında jańa baǵdarlarda ilimiy-izertlew jumısların alıp barıw maqsetinde aldaǵı waqıtlarda ámelge asırılatuǵın jumıslar haqqında da pikirler bildirildi.

Ilaj instituttıń Túrkiy tiller fakulteti qábiletli studentleriniń atqarıwındaǵı bayram koncerti menen dawam etti.

NMPI baspasóz xızmeti.