ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Germaniyalı ilimpaz oqıtıwshınıń ashıq sabaǵına joqarı baha berdi

Ájiniyaz atındaǵı Nókis mámleketlik pedagogikalıq institutı akademiyalıq liceyiniń nemis tili páni oqıtıwshısı Dilbar Abdireymova shet tilleri baǵdarınıń 205-toparında «Film und Theater» atamasında ashıq sabaǵın ótti.

Ashıq sabaqtı germaniyalı ilim doktorı, belgili filolog Renate Bürner de baqlap bardı.

Sabaq dawamında oqıwshılar úyge berilgen tapsırmalardı tolıq nemis tilinde aytıp berdi. Oqıtıwshı taza temanı kórgizbe quralları járdeminde túsindirdi. Bekkemlew basqıshında interaktiv shınıǵıwlar orınlandı. Oqıwshılar qaraqalpaqsha spektakldi nemis tilinde saxnalastırdı. Oqıtıwshı hár bir shınıǵıwǵa belsene qatnasqan oqıwshılardı belgilep, bahalap bardı.

– Topar bolıp islewde dıqqatqa ılayıqlı tárepi sonda, oqıwshılar erkin túrde tarqatpa materiallar járdeminde shınıǵıwlardı orınladı. Men bunnan úlgi alıwdı usınıs etken bolar edim, sebebi oqıwshılardıń ózbetinshe jumıs islewin qollap-quwatlaw hám olardıń qátelerin dúzetiw ózine bolǵan, oqıtıw sistemasına bolǵan juwapkershilikti bildiredi, — dedi germaniyalı ilimpaz sabaq juwmaǵında óz pikirlerin bildirip.