Búgin, 23-oktyabr kúni Ózbekstan Respublikası Mektepke shekemgi hám mektep bilimlendiriwi ministriniń birinshi orınbasarı – Mektepke shekemgi bilimlendiriw agentliginiń direktorı Agrippina Shin Ájiniyaz atındaǵı Nókis mámleketlik pedagogikalıq institutına keldi.

Agentlik direktorı institut janında respublikamızda birinshilerden bolıp shólkemlestirilgen 90 orınǵa mólsherlengen mektepke shekemgi bilimlendiriw shólkemindegi sharayatlardı kózden ótkerdi.

Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, institut rektorı wazıypasın waqıtsha atqarıwshısı Q.Qodirov institutta mektepke shekemgi bilimlendiriw baǵdarı boyınsha klasster usılında kadr tayarlaw boyınsha ámelge asırılıp atırǵan jumıslar haqqında maǵlıwmat berip, balalar baqshasındaǵı imkaniyatlardı tanıstırdı.

Instituttıń byudjetten tıs qarjıları esabınan 4,3 milliard sum ajıratılıp, paydalanıwǵa tapsırılıw aldında turǵan balalar baqshasındaǵı sharayatlarǵa joqarı baha berip, bul jerde tárbiyalanıwshı balalar ushın qosımsha imkaniyatlar jaratıw boyınsha tiyisli usınısların bildirdi.

Sonıń menen birge, instituttıń Mektepke shekemgi tálim fakulteti professor-oqıtıwshıları hám studentleri menen sáwbetlesip, tarawǵa zamanagóy maman kadrlardı tayarlap shıǵarıw boyınsha kórsetpeler berdi.

Maǵlıwmat ornında atap ótiwimiz kerek, bul jerde mektepke shekemgi tálim baǵdarınıń studentleri, magistrant hám doktorantları ushın hár qıylı metodikalardı qollanıw arqalı balalarda kreativ oylaw, jámiyetshilik penen qarım-qatnas sıyaqlı kónlikpelerdi payda etiwge tiykar jaratıladı. Sonıń menen birge, institutta mektepke shekemgi bilimlendiriw tarawı boyınsha qánigelikti bahalaw orayınıń jumısı da jolǵa qoyılmaqta. Bul arqalı respublikamızda jumıs islep atırǵan balalar baqshalarındaǵı tárbiyashı-pedagoglar jáne metodistlerdiń bilim hám tájiriybelerin arttırıwǵa kómeklesiw tiykarǵı maqset etip belgilengen.

Bunday jumıslardıń barlıǵı elimizde keleshek áwladlar tárbiyası baǵdarında alıp barılıp atırǵan reformalardıń ámeliy nátiyjeleri bolıp esaplanadı.

NMPI baspasóz xızmeti.