Sociallıq tarmaqlarda Ájiniyaz atındaǵı Nókis mámleketlik pedagogikalıq institutında studentler Telegram messendjerindegi kanallardıń birinde ótkerilip atırǵan sorawnamada qatnasıp, dawıs beriwge májbúrlenip atırǵanı haqqında materiallar járiyalandı.

Ájiniyaz atındaǵı Nókis mámleketlik pedagogikalıq institutı jaǵday boyınsha tómendegishe maǵlıwmat beredi:

Ayrıqsha atap ótiw orınlı, sońǵı jıllarda Prezidentimiz basshılıǵında Qaraqalpaqstan Respublikasın jámiyetlik-siyasiy, social-ekonomikalıq jaqtan rawajlandırıw maqsetinde kóplegen tariyxıy reformalar ámelge asırılmaqta. Qaraqalpaqstan Respublikası Joqarǵı Keńesi tárepinen de xalıqtıń abadan turmısın támiyinlew, ásirese, elimiz jaslarınıń bilim alıwı, kásip-óner úyreniwi ushın keń kólemli jumıslar sistemalı túrde alıp barılmaqta.

Institutta studentler arasında usınday jumıslardı úgit-násiyatlaw, ámelge asırılıp atırǵan reformalarǵa biyparıq bolmaǵan halda sorawnamada qatnasıw usınıs etilgen. Biraq, bul jaǵdayda studentlerdi májbúrlep dawıs bergiziw boyınsha hesh qanday kórsetpe yamasa tapsırmalar berilmegen.

Sociallıq tarmaqta járiyalanǵan maǵlıwmatlar instituttıń tiyisli juwapkerleri tárepinen úyrenilmekte.

NMPI baspasóz xızmeti.