ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Matematika páni boyınsha xalıqaralıq olimpiada juwmaqlandı

Aldın xabar bergenimizdey, usı jıldıń 25-27-oktyabr kúnleri aralıǵında paytaxtımız Nókis qalasında joqarı oqıw orınları studentleri arasında matematika páninen Muhammed ál-Xorezmiy atındaǵı II Xalıqaralıq olimpiadası ótkerildi.

Búgin, 27-oktyabr kúni Berdaq atındaǵı Qaraqalpaq mámleketlik akademiyalıq muzıkalı teatrında xalıqaralıq pán olimpiadasınıń juwmaqlarına baǵıshlanǵan sıylıqlaw ilajı hám koncert baǵdarlaması bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, xalıqaralıq olimpiada qatnasıwshıların qutlıqladı hám jeńimpazlarǵa diplom jáne medallardı tapsırdı.

Ulıwma 40 tan aslam joqarı oqıw orınlarınan 200 den aslam student-jaslar qatnasqan matematika páninen Muhammed ál-Xorezmiy atındaǵı II Xalıqaralıq olimpiadası juwmaqları boyınsha ulıwma komandalıq esapta Berdaq atındaǵı Qaraqalpaq mámleketlik universiteti hám Samarqand mámleketlik universiteti 1-orındı iyeledi.

Túrkmenstan Respublikasınıń Gumanitar hám rawajlanıw xalıqaralıq universiteti komandası 2-orın, al Ózbekstan Milliy universiteti komandası sıylı 3-orındı iyeledi.

Xalıqaralıq pán olimpiadasınıń juwmaǵına baǵıshlanǵan ilaj respublikamızdıń kórkem óner ǵayratkerleri atqarıwındaǵı koncert baǵdarlaması menen dawam etti.

NMPI baspasóz xızmeti.
©️Fotosúwretler avtorı: Islam Matekov.