Xosh xabar! NMPI studenti Ismetulla Nawrızbaev xalıqaralıq pán olimpiadasında 3-orındı iyeledi
Aldın xabar bergenimizdey, usı jıldıń 25-27-oktyabr kúnleri aralıǵında paytaxtımız Nókis qalasında joqarı oqıw orınları studentleri arasında matematika páninen Muhammed ál-Xorezmiy atındaǵı II Xalıqaralıq olimpiadası ótkerildi.
Búgin, 27-oktyabr kúni Berdaq atındaǵı Qaraqalpaq mámleketlik akademiyalıq muzıkalı teatrında xalıqaralıq pán olimpiadasınıń juwmaqlarına baǵıshlanǵan sıylıqlaw ilajı hám koncert baǵdarlaması bolıp ótti.
Quwanıshlı tárepi, xalıqaralıq pán olimpiadasınıń juwmaqlarına bola Ájiniyaz atındaǵı Nókis mámleketlik pedagogikalıq institutı Fizika-matematika fakulteti matematika hám informatika tálim baǵdarınıń 2-kurs studenti Ismetulla Nawrızbaev 3-orındı iyelep, qola medalı hám diplom menen sıylıqlandı.
Maǵlıwmat ornında atap ótiw orınlı, joqarı oqıw orınları studentleri arasında matematika páninen Muhammed ál-Xorezmiy atındaǵı Xalıqaralıq olimpiadasınıń jeńimpazları hám sıylı orın iyeleri magistratura basqıshına mámleketlik grant tiykarında qabıl etiledi.
Esletip ótemiz, xalıqaralıq pán olimpiadasına Ájiniyaz atındaǵı Nókis mámleketlik pedagogikalıq institutı Fizika-matematika fakulteti matematika hám informatika tálim baǵdarınıń 2-kurs studentleri – Kamron Ibadullaev, Ismetulla Nawrızbaev, Bahram Allakuatov, Maman Genjalievler qatnastı.
Xalıqaralıq pán olimpiadasına studentlerdi instituttıń matematikanı oqıtıw metodikası kafedrasınıń úlken oqıtıwshısı Azamat Xojaniyazov tayarladı.
NMPI baspasóz xızmeti.