ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Belgili shayır, pedagog hám ilimpaz Túrkmenbay Jiyemuratovtıń 70 jıllıǵı belgilendi

Búgin, 2-noyabr kúni Ájiniyaz atındaǵı Nókis mámleketlik pedagogikalıq institutında talantlı shayır, pedagog hám ilimpaz Túrkmenbay Jiyemuratovtıń 70 jıllıǵına arnalǵan yubiley keshesi bolıp ótti.

Ilajdı institut rektorı wazıypasın waqıtsha atqarıwshısı Q.Qodirov basqarıp bardı.

Keshede Qaraqalpaqstan Respublikası Joqarǵı Keńesiniń komitet baslıǵı Sh.Ótemisov Joqarǵı Keńes Baslıǵı Amanbay Orınbaevtıń yubiley iyesine jollaǵan qutlıqlaw xatın oqıp esittirdi hám sawǵaların tapsırdı.

Ilajda Qaraqalpaqstan Respublikası Jazıwshıları awqamınıń baslıǵı, Ózbekstan xalıq jazıwshısı, Qaraqalpaqstan xalıq shayırı K.Kárimov, filologiya ilimleriniń doktorı, Ózbekstan Ilimler Akademiyası Qaraqalpaqstan bólimi Qaraqalpaq gumanitar ilimler ilim-izertlew institutınıń jetekshi ilimiy xızmetkeri K.Palımbetov, instituttıń ulıwma pedagogika hám psixologiya kafedrasınıń baslıǵı, pedagogika ilimleriniń doktorı, professor T.Utebaev, sonday-aq, Túrkmenbay Jiyemuratovtıń zamanlasları, kásiplesleri, shákirtleri, jaqınları sózge shıǵıp, onıń ómiri hám dóretiwshiligi, ilimiy-pedagogikalıq jumısları haqqında aytıp ótti.

Xalqımızǵa «Muradıy» ádebiy laqabı menen belgili shayır, pedagog hám ilimpaz Túrkmenbay Jiyemuratov 1953-jılı tuwılǵan. Shımbay rayonı Shaqaman awılındaǵı mektepti pitkerip, Tashkent mámleketlik universitetiniń Fizika fakultetine oqıwǵa kirdi.

Universitetti pitkerip, dáslepki miynet jolın Nókis qalasındaǵı 21-sanlı mektepte fizika páni muǵallimi bolıp islewden baslaǵan Túrkmenbay Jiyemuratov keyin ala mektep direktorınıń orınbasarı, mektep direktorı lawazımlarına shekem kóterilgen.

1990-jıldan baslap Qaraqalpaqstan Respublikası Xalıq bilimlendiriw ministrligi metodikalıq kabinetiniń aǵa metodisti, sońınan Oqıw-metodikalıq orayınıń birinshi kategoriyalı qánige-metodisti lawazımlarında jemisli miynet etti.

1994-jıldan baslap búgingi kúnge shekem Ájiniyaz atındaǵı Nókis mámleketlik pedagogikalıq institutı ulıwma pedagogika hám psixologiya kafedrasında jaslarǵa tálim-tárbiya berip, kóplegen shákirtler tayarlap kelmekte.

Ol pedagogika teoriyası tariyxı boyınsha ilimiy-izertlew jumısların alıp barıp, 2006-jılı kandidatlıq dissertaciyasın tabıslı qorǵap shıqtı. Sońınan docent ilimiy ataǵın aldı.

Pedagog-ilimpaz sıpatında «Qoraqalpoǵistonda maktabdan tashqari ta’lim muassasalari» atamasındaǵı monografiyanı, joqarı oqıw orınları studentleri ushın arnalǵan «Pedagogika tariyxı», «Pedagogika» atamalarındaǵı ulıwma 6 metodikalıq qollanbalardı baspaǵa tayarladı. Júzden aslam ilimiy maqalaları jurnallarda jarıq kórdi.

1997-jıldan Ózbekstan hám Qaraqalpaqstan Jazıwshıları awqamınıń aǵzası bolǵan shayır Túrkmenbay Jiyemuratov 9 poeziyalıq, balalar ushın arnalǵan gúrrińler toplamınıń avtorı esaplanadı.

Atap aytqanda, «Gózzallıq álemi», «Ushırattım bir gózzaldı», «Rubayılar», «Jaraǵan túye», «Kárwan», «Ǵáziyne», «Degish», «Ándiyshe», «Qızıl jıńǵıl gúlleri», «Ilham sháshmesi» atamalarındaǵı kitapları basıp shıǵarıldı.

Sonıń menen birge, onıń qosıqları hám gúrrińleri respublikalıq hám xalıqaralıq dóretiwshilerdiń toplamlarınan da orın aldı.

Ol sheber awdarmashı sıpatında jáhán hám túrkiy xalıqları ádebiyatınıń eń jaqsı shıǵarmaların qaraqalpaq tiline awdarıwda ádebiyatımızdıń rawajlanıwına salmaqlı úleslerin qosıp kelmekte.

Shayır Túrkmenbay Jiyemuratov shıǵıs poeziyası janrlarınıń úlgisinde ǵázzel, másnáwiy, qasıyda, fárd, rubayı, termeler jazǵan.

2021-jıl ol Qaraqalpaqstan Respublikası Joqarǵı Keńesi Prezidiumı qararı tiykarında «Ardaqlı nuranıy» kókirek belgisin menen sıylıqlandı.

Keshede instituttıń talantlı studentleri Túrkmenbay Jiyemuratovtıń qálemine tiyisli qosıqlardı atqardı.

Ilaj kórkem-ádebiy bólim menen dawam etti.

NMPI baspasóz xızmeti.