Sońǵı jıllarda Aralboyı aymaǵında ekologiyalıq jaǵdaydı túp-tiykarınan jaqsılaw, aymaqtı sociallıq-ekonomikalıq jaqtan rawajlandırıwdı jedellestiriw, sonday-aq, xalıqtıń turmıs tárizi hám dáramatların arttırıwǵa baǵdarlanǵan keń kólemli reformalar ámelge asırılmaqta.

Aral teńiziniń qurıǵan ultanında ekosistemanı jaqsılaw, izertlewler hám innovaciyalardıń aldınǵı tájiriybelerin engiziw maqsetinde Ózbekstan Respublikası Prezidenti janındaǵı Aralboyı xalıqaralıq innovaciya orayı hám Birlesken Milletler Shólkeminiń Aralboyı regionı ushın Insan qáwipsizligi boyınsha kóp tárepleme sheriklik trast fondı shólkemlestirildi, sonday-aq, Aralboyı regionın ekologiyalıq innovaciyalar hám texnologiyalar aymaǵı dep járiyalaw haqqında Birlesken Milletler Shólkemi Bas Assambleyasınıń arnawlı rezolyuciyası qabıl etildi.

Búgingi kúnge shekem teńizdiń qurıǵan túbinde 1,7 million gektarlıq maydanda seksewil, cherkez, qandım sıyaqlı duzǵa hám qurǵaqshılıqqa shıdamlı ósimliklerden ibarat jasıl toǵaylıqlar payda etildi. Quwanıshlısı, shól ósimlikleriniń kógeriwi boyınsha jaqsı nátiyjelerge erisilmekte.

Usınday iygilikli jumıslardan ilhamlanǵan hám oǵan óz úleslerin qosıwdı maqset etken Ájiniyaz atındaǵı Nókis mámleketlik pedagogikalıq institutınıń miynet jámááti hám belsendi student-jasları elimizde hár jılı joqarı shólkemleskenlik penen ótkerilip kiyatırǵan «Jasıl mákan» ulıwma milliy joybarı, sonıń menen birge, 25-oktyabr – 1-dekabr kúnleri aralıǵında járiyalanǵan «gúzgi terek egiw máwsimi»nde Moynaq rayonında jasıl baǵlardı jaratıwǵa bel bayladı.

Jaslar erte tańnan institut átirapında jám bolıp, bir maqset – keleshek áwladlar ushın jasıl zonalardı kóbeytiw ushın jolǵa atlandı.

Student-jaslar institut rektoratı wákilleri hám ustazları menen birgelikte rayondaǵı «Qızıl jar» awıl puqaralar jıyını aymaǵındaǵı mámleketlik toǵay xojalıǵınıń pitomniginde ajıratılǵan maydanǵa 300 den aslam hár qıylı miywe hám dekorativ terek nállerin otırǵızdı.

Bul islerde instituttıń Tábiyǵıy pánler fakultetiniń tájiriybeli professor-oqıtıwshıları, sonıń menen birge, toǵay xojalıǵınıń qánigeleri jaslarǵa jol-jobalar berip, nállerdi otırǵızıwdıń qaǵıydaların túsindirdi.

– Prezidentimizdiń «Mádeniyat – Moynaqtan baslanadı» dep aytıp ótkenindey, búgin bizler jaslar arasında ekologiyalıq mádeniyattı jetilistiriw, elimizde ámelge asırılıp atırǵan kógallandırıw jumıslarına qol-kómegimizdi beriw maqsetinde usı jerde iygilikli baslamalardı ámelge asırıp atırmız. Men oylayman, bizlerdiń usınday hár bir háreketimiz mámleketimizdiń jasıl aymaqqa aylanıwı hám ekologiyalıq turaqlılıqtı támiyinlewge belgili dárejede úles qosadı, – deydi instituttıń Tariyx fakulteti studenti, belsendi jaslardıń biri Erniyaz Qasımov.

Dıqqatqa ılayıqlı tárepi, jaslardıń bunday baslamaların awıl turǵınları, sonıń ishinde, jasıúlken apalarımız da qollap-quwatlap, jaslarǵa harmasın aytıp, birgelikte náller otırǵızdı. Qosıqlar aytıp, kewil-keypiyatların kóterdi.

Jaslar usınday iygilikli islerden keyin Moynaq rayonında mámleketimiz basshısınıń uzaqtı gózlep ámelge asırılıp atırǵan reformalarınıń ámeliy nátiyjeleri menen tanısıp, Aral teńiziniń tariyxı búgin onıń qurıǵan ultanında islenip atırǵan tariyxıy jumıslar haqqında maǵlıwmatlarǵa iye boldı.

NMPI baspasóz xızmeti.