18-noyabr – Ózbekstan Respublikasınıń «Mámleketlik bayraǵı haqqında»ǵı nızamınıń qabıl etilgen kúni. Sáne múnásibeti menen Ájiniyaz atındaǵı Nókis mámleketlik pedagogikalıq institutında ushırasıw keshesi bolıp ótti.

Mámleketlik gimnler menen baslanǵan saltanatlı ilajǵa instituttıń milliy ideya, ruwxıylıq tiykarları hám huqıq tálimi kafedrasınıń úlken oqıtıwshısı Q.Pirimbetov, profilaktikalıq inspektor, kapitan B.Masharipov hám belsendi studentler qatnastı.

Ushırasıwdı institut rektorı wazıypasın waqıtsha atqarıwshısı Q.Qodirov basqarıp bardı.

Ilajda sózge shıqqanlar tárepinen atap ótilgenindey, bıyıl mámleketlik suverenitettiń belgilerinen biri bolǵan ǵárezsiz Ózbekstan Respublikasınıń «Mámleketlik bayraǵı haqqında»ǵı nızamınıń qabıl etilgenine 32 jıl tolmaqta. Ózbekstan Respublikası Oliy Kengashiniń 1991-jıl 18-noyabrdegi gezekten tıs VII sessiyasında tastıyıqlanǵan mámleketlik bayraǵı jer júzinde ǵárezsiz Ózbekstan degen mámlekettiń bar ekenligin ańlatadı hám ózinde milliy-mádeniy dástúrlerdi jámleydi.

Bayraq ózinde pútkil Ózbekstan xalqınıń ázeliy tilek-umtılısları, erk-ıqrarı, xalqımızǵa tán miymandoslıqtı sáwlelendirgen. Mámleketlik bayraqtıń mámleketlik mákeme hám shólkemler, oqıw orınları, Ózbekstan aǵzası bolǵan xalıqaralıq shólkemler, sırt ellerdegi elshixana hám turaqlı wákilxanalardıń aldında jelbirep turıwı, hár qıylı bayram saltanatlarında, mámleketimiz wákilleri qatnasıp atırǵan xalıqaralıq kólemdegi siyasiy, mádeniy-aǵartıwshılıq ilajlarda, abıroylı sport jarıslarında watanımızdıń abıroy-mártebesi, xalqımızdıń maqtanıshın ayqın sáwlelendirip, kewillerdi tolqınlandıradı.

Mámleketlik belgiler bárqulla muqaddes hám ullı bolıp tabıladı. Óytkeni, ol xalıqtıń ótmishi, búgini hám keleshegin ózinde jámlegen watannıń simvolı esaplanadı.

Ilajda professor-oqıtıwshılar hám belsendi studentler sózge shıǵıp, ushırasıw qatnasıwshıların bayram menen qutlıqladı.

NMPI baspasóz xızmeti.