Ájiniyaz atındaǵı Nókis mámleketlik pedagogikalıq institutında jaslardı sociallıq jaqtan qollap-quwatlaw baǵdarında ámelge asırılıp atırǵan jumıslar haqqında ashıq sáwbetlesiw bolıp ótti.

Ilajǵa instituttıń jaslar awqamı baslanǵısh shólkemi jetekshisi B.Gúlimbetov, kásiplik awqamı komitetiniń baslıǵı K.Gúlimbetov, fakultet dekanlarınıń jaslar menen islesiw boyınsha orınbasarları, fakultetlerdegi jaslar jetekshileri, studentler keńesiniń belsendi aǵzaları hám ǵalaba xabar quralları wákilleri qatnastı.

Búgingi kúnde Ájiniyaz atındaǵı Nókis mámleketlik pedagogikalıq institutında 19 mıńǵa shamalas student-jaslar bilim almaqta. Jaslar tárbiyası, olardı qollap-quwatlaw máseleleri menen tikkeley jumıs alıp barıw jaslar menen islesiw, ruwxıy-aǵartıwshılıq bólimi, dekan orınbasarları, málimleme-resurs orayı, social-gumanitar baǵdarlardaǵı kafedralar, sonday-aq, jaslar awqamı, hayal-qızlar keńesi, sport klubı hám studentler keńesi sıyaqlı jámiyetlik shólkemler, jaslardıń baslamaların, qábiletlerin júzege shıǵarıw orayları jáne profilaktikalıq inspektorlar, tyutorlar, pedagog-tárbiyashılar hám institut psixologlarınan ibarat úlken jámááttiń tiykarǵı wazıypalarına kirgizilgen.

Bul baǵdardaǵı jumıslardıń usınday sistemalı jolǵa qoyılıwı institut student-jaslarınıń ilim, bilimlendiriw, kórkem óner, mádeniyat, sport hám basqa da baǵdarlarda joqarı nátiyjelerge erisiwine tiykar bolmaqta.

Ásirese, bunıń ishinde ayrıqsha atap ótiwimiz zárúr bolǵan studentler keńesi Ózbekstandaǵı barlıq joqarı oqıw orınları arasında dáslepki jolǵa qoyılǵan, jaslar menen islesiwdegi ózgeshe hám nátiyjeli strukturaǵa aylandı.

2019-jıldan berli qábiletli, ziyrek studentlerdi anıqlaw, olardı hár tárepleme qollap-quwatlaw maqsetinde jumıs alıp barıp atırǵan bul sistema hár bir fakultetten oqıwda hám jámiyetlik jumıslarda belsendilik kórsetip kiyatırǵan jaslardı qamtıp alıwda úlken tájiriybe topladı. Jaslardıń baslamaların ámeliyatqa keń engiziw hám jaslardı xoshametlew maqsetinde pútkilley jańasha sistema – studentlerge bazalıq stipendiyanıń 50% ine shekemgi muǵdarda ústeme haqı tólew ámeliyatqa engizilip, bir ǵana 2022-2023-oqıw jılı dawamında bunday imkaniyattan 1500 den aslam studentler nátiyjeli paydalanǵan bolsa, 2023-2024-oqıw jılı ushın usınıslar toplanbaqta.

Sociallıq qorǵawǵa mútáj bolǵan studentlerden 304 jastıń bir jıllıq tólemli kontrakt pulları ministrlik, sonday-aq, Qaraqalpaqstan Respublikası Joqarǵı Keńesi, Jaslar isleri agentligi hám instituttıń óz qarjıları esabınan tólep berildi.

Sonıń menen birge, ijarada jasaytuǵın studentlerdiń ijara tólemlerin tólep beriw boyınsha úlgili jumıslar alıp barılıp, atap aytqanda, 2021-2022-oqıw jılında 1200 den aslam, 2022-2023-oqıw jılında 1500 den aslam studentlerge ijara tólemleri tólendi. Bıyılǵı oqıw jılında bul baǵdardaǵı jumıslar nátiyjeli dawam ettirilmekte.

Ashıq sáwbetlesiw barısında jaslardı sociallıq jaqtan qollap-quwatlaw baǵdarında ámelge asırılıp atırǵan jumıslar hám usı baǵdardaǵı jańalıqlardı student-jaslarǵa jetkeriwdiń nátiyjeli mexanizmlerin engiziw boyınsha pikir-usınıslar bildirildi.

Ilaj óz ara pikir almasıwlar menen dawam etti.

NMPI baspasóz xızmeti.