Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı R.Eshmuratov basshılıǵındaǵı rásmiy delegaciya aǵzaları Qazaqstan Respublikası L.N.Gumilyov atındaǵı Evraziya milliy universiteti basshılarınıń mirát etiwine bola ámeliy sapar sheńberinde usı universitette bolıp turıptı.

Sapardan gózlengen tiykarǵı maqset ximiya, biologiya hám filologiya baǵdarları boyınsha qospa tálim baǵdarlamaların ashıwdan ibarat.

Delegaciya aǵzaları universitettiń tiykarǵı oqıw imaratı, Tábiyiy pánler fakulteti, laboratoriyalar, ilimiy-izertlew orayları, Filologiya fakulteti, kafedralar hám basqa bólimlerde bolıp, olardaǵı oqıw procesi menen jaqınnan tanıstı.

Universitet rektorı hám prorektorları menen bolıp ótken rásmiy ushırasıwda qospa tálim baǵdarlamaların ashıw, institut oqıtıwshılarınıń Evraziya milliy universitetinde tájiriybe almasıwı hám qánigeligin jetilistiriw, sonday-aq, universitet professor-oqıtıwshıların instituttaǵı oqıw procesine shaqırıw máseleleri dodalandı.

Ushırasıwda EMU rektorı NMPI menen birge islesiwden mápdar ekenligin bildirip, eki joqarı oqıw ornı arasındaǵı doslıq baylanıslarınıń rawajlanıp, bekkemlenip atırǵanın ayrıqsha atap ótti.

Maǵlıwmat ornında atap ótiw kerek, L.N.Gumilyov atındaǵı Evraziya milliy universiteti «QS» reytingi boyınsha «TOP-300»likke kiretuǵın joqarı oqıw ornı esaplanadı.

NMPI baspasóz xızmeti.