Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı Shet tilleri fakultetiniń 1-kurs studenti Alfiya Amangeldieva Ózbekstan «Milliy tiklanish» demokratiyalıq partiyası Oraylıq Keńesi tárepinen ótkerilip atırǵan «Nodirai davronlar» tańlawınıń respublikalıq basqıshına jollama alǵan edi.

Quwanıshlısı, tańlawdıń final basqıshında Ózbekstannıń barlıq aymaqlarında jeńimpaz bolǵan 14 qatnasıwshı arasınan «Qátesiz jazamız», «Qádiriyatlarǵa súyengen rawajlanıw» hám «Kútilmegen soraw» shártleri boyınsha institutımız studenti Alfiya Amangeldieva sıylı 2-orındı iyeledi.

Partiya Oraylıq Keńesi «Hayal-qızlar qanatı» tárepinen shólkemlestirilgen tańlawǵa Shańaraq hám hayal-qızlar komiteti janındaǵı «Qızlarjan» hám Jaslar isleri agentligi janındaǵı «Qızlar hawazı» klublarına aǵza bolǵan 18 jastan 30 jasqa shekemgi bolǵan siyasatqa qızıǵatuǵın, jetekshilik qábiletine iye, jámiyette belsendi bolǵan jaslar qatnastı.

Tańlawdı ótkeriwden tiykarǵı maqset – elimizde hayal-qızlardıń jámiyetlik-siyasiy belsendiligin arttırıw, huqıqıy sanası hám mádeniyatın jetilistiriw, siyasiy jetekshilik qábiletin júzege shıǵarıw arqalı olardı siyasiy processlerge tayarlaw, sonıń menen birge, Jaslar parlamenti hám wákillik uyımlarına rezerv kadrlardı qáliplestiriwden ibarat.

Qatnasıwshılardıń shıǵıwı partiyanıń Oraylıq hám aymaqlıq Keńesleri baslıqlarınıń orınbasarları, Oliy Majlis Nızamshılıq palatası hám xalıq deputatları jergilikli Keńes deputatları hám birge islesiwshi shólkem wákillerinen quralǵan tóreshiler quramı aǵzaları tárepinen bahalandı.

Tańlaw jeńimpazları hám sıylı orın iyeleri shólkemlestiriwshiler tárepinen diplom hám estelik sawǵaları menen sıylıqlandı.

NMPI baspasóz xızmeti.