Rayonlarǵa qaytatuǵın NMPI studentleri ushın biypul avtobuslar jolǵa qoyıldı

Búgin, 23-dekabr kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministrligi menen birgelikte respublikamızdıń arqa hám qubla-batıs aymaqlarındaǵı rayonlarda jasaytuǵın studentlerge qısqı demalıs dáwirin úylerinde ótkeriwi maqsetinde óz mánzillerine qáwipsiz jetip alıwı ushın biypul avtobuslar shólkemlestirildi.

Instituttıń profilaktikalıq inspektorı, kapitan B.Masharipov hám pedagog-tárbiyashı R.Qudiyarova studentlerdi kirip kiyatırǵan jańa jıl bayramı menen qutlıqlap, mazmunlı demalıs hám haq jol tiledi.

Avtobuslar instituttıń 1-sanlı studentler turaq jayı aldında óz úylerine qaytıwǵa toplanǵan studentlerdi alıp, Qaraqalpaqstan Respublikası Ishki isler ministrligi jol háreketi qáwipsizligi xızmeti wákilleri basshılıǵında belgilengen rayonlarǵa qaray háreketlendi.

Esletip ótemiz, Ózbekstan Respublikası Ministrler Kabinetiniń qararı jáne Joqarı bilimlendiriw, ilim hám innovaciyalar ministrliginiń tiyisli buyrıǵı tiykarında joqarı oqıw orınları studentleri ushın qısqı demalıs múddeti 2023-jıldıń 25-dekabrinen 2024-jıldıń 7-yanvarına shekem etip belgilengen. Sabaq processleri 2024-jıldıń 8-yanvarınan baslanadı.

NMPI baspasóz xızmeti.