Ájiniyaz atındaǵı Nókis mámleketlik pedagogikalıq institutında qısqı demalıs dáwirinde professor-oqıtıwshılar hám pedagog xızmetkerlerdiń tájiriybesin arttırıw, qánigeligin jetilistiriw maqsetinde birqatar seminarlar shólkemlestirilmekte.

Ótken jılda instituttıń 50 ge shamalas professor-oqıtıwshıları hám qánigeleri xalıqaralıq reyting shólkemleriniń «TOP-1000»lıq dizimine kiretuǵın joqarı oqıw orınları hám ilimiy-izertlew oraylarında tájiriybe arttırıp qaytqan edi.

Sonıń ishinde, Finlyandiya, Rossiya Federaciyası, Qazaqstan hám basqa da mámleketlerde xızmet saparlarında bolǵan professor-oqıtıwshılar óz tájiriybelerin kásiplesleri menen bólisti. Seminarlar barısında sırt ellerdegi kadrlar tayarlawdıń ózgeshelikleri, oqıw hám ámeliyattıń birgelikte ámelge asırılıwı menen baylanıslı úlgili tárepleri haqqında maǵlıwmatlar berilip, eń aldınǵı tájiriybelerdi institutta da engiziw boyınsha pikir almasıldı.

Sonday-aq, instituttıń barlıq fakultetlerinde hám kafedralar kesiminde Ózbekstan Respublikası Prezidentiniń Respublikalıq Mánawiyat hám aǵartıwshılıq keńesiniń keńeytilgen jıynalısında alǵa súrgen baslamaları professor-oqıtıwshılar hám pedagog xızmetkerler qatnasıwında úyrenip shıǵılıp, aldaǵı ámelge asırılatuǵın jumıslar belgilep alındı.

NMPI baspasóz xızmeti.