Ájiniyaz atındaǵı Nókis mámleketlik pedagogikalıq institutında Ózbekstan Respublikası Qurallı Kúshleriniń dúzilgenine 32 jıl tolıwı hám 14-yanvar – Watan qorǵawshıları kúnine baǵıshlanǵan ushırasıw hám bayram keshesi bolıp ótti.

Institut rektorı wazıypasın waqıtsha atqarıwshısı Q.Qodirov basqarıp barǵan ilajǵa Qaraqalpaqstan Respublikası Veteranlar keńesi baslıǵı, podpolkovnik P.Ergunusov, awǵan urısı veteranları U.Allayarov, O.Tóreniyazov, Arqa-batıs áskeriy okrugi Nókis garnizonı hám áskeriy bólimlerdiń komandirleri, múddetli áskeriy xızmetti atqarıp atırǵan er-azamatlar, sonıń menen birge, fakultetlerdiń dekan orınbasarları, tyutorlar hám student-jaslar qatnastı.

Ushırasıwda shıǵıp sóylegenler mámleketimiz Qurallı Kúshleriniń dúziliwi, sońǵı jıllarda jáne de rawajlandırıw, onıń jawıngerlik tayarlıǵın jetilistiriw, materiallıq-texnikalıq bazasın bekkemlew, xalıqaralıq abırayın arttırıw baǵdarında ámelge asırılıp atırǵan jumıslar, tarawdaǵı reformalardıń nátiyjeliligi haqqında maǵlıwmatlar berdi.

Ótken jıllar dawamında Ózbekstan Respublikasın rawajlandırıw boyınsha Háreketler, sonday-aq, Rawajlanıw strategiyaları hám Qorǵanıw doktorinası tiykarında áhmiyetli jáne tariyxıy qararlar qabıl etildi. Ásirese, elimiz kóleminde áskeriy-hákimshilik sektorlarınıń dúzilgenligi, jergilikli byudjet qarjıları esabınan áskeriy xızmetlerdi qollap-quwatlaw, olarǵa múnásip jumıs hám turmıs sharayatların jaratıp beriwde islenip atırǵan jumıslar óz nátiyjelerin bermekte.

Atap aytqanda, milliy armiyamızdıń aymaqlıq, xalıqaralıq reytinglerdegi, ótkerilip atırǵan hár qıylı jarıslardaǵı kórsetkishleri joqarılamaqta. Búgingi kúnde Qurallı Kúshlerimiz dúnya júzinde hám ǴMDA, sonıń menen birge, Oraylıq Aziya mámleketleri arasında joqarı orınlardı iyelemekte.

Milliy, aymaqlıq hám globallıq qáwipsizlikke qarsı hár qıylı qáwipler júz berip atırǵan búgingi kúnde xalqımızdıń tınısh hám paraxat turmısta ómir súriwi, shegaralarımızdıń pútinligin jáne qolqatılmaslıǵın támiyinlew hár birimizdiń aldımızdaǵı baslı wazıypalardan biri bolıp esaplanadı.

Ilajda usınday úlken maqsetlerden kelip shıǵıp, Prezidentimizdiń «Jańa Ózbekstannıń 2022-2026-jıllarǵa belgilengen Rawajlanıw strategiyası haqqında»ǵı pármanınıń joybarında kórsetip ótilgen jeti baslı baǵdardıń biri elimiz qáwipsizligi hám qorǵanıw potencialın kúsheytiw, ashıq-aydın hám pragmatikalıq, jedel sırtqı siyasat alıp barıw ekenligi, sonday-aq, olardan kelip shıǵıp ámelge asırılıp atırǵan jumıslar haqqında maǵlıwmatlar berildi.

Sonıń menen birge, veteran áskeriy xızmetkerler jaslarǵa ózleriniń ómir jolı, awǵan urısınıń aqıbetleri haqqında ayta kelip, búgingidey tınısh hám paraxat turmısımızdıń qádirine jetip, jaratılıp atırǵan imkaniyatlardan nátiyjeli paydalanıp, elimizdiń rawajlanıwına úleslerin qosıwǵa shaqırdı.

Ilaj instituttıń talantlı student-jasları atqarıwındaǵı koncert baǵdarlaması menen dawam etti.

NMPI baspasóz xızmeti.