Elimizde Watandı qorǵawday ullı xızmetke ózin baǵıshlaǵan áskerlerimiz sheksiz húrmet hám izzetke bólenip, hár jılı 14-yanvar – Watan qorǵawshıları kúni kóterińki ruwxta úlken bayram sıpatında belgilenedi.

Álbette, Watandı qorǵaw hámme ushın muqaddes wazıypa esaplanadı. Bul wazıypanı atqarıwda elimizdiń qorǵawshıları bolǵan milliy armiyamız hám barlıq huqıq qorǵaw uyımları tárepinen xalqımızdıń tınısh hám paraxat turmısın támiyinlew baǵdarında alıp barıp atırǵan jumısların ayrıqsha atap ótiwimiz orınlı.

Prezidentimiz Shavkat Mirziyoevtiń «Armiya hám xalıq – bir tán, bir jan!» degen iygilikli ideya hám ámeliy háreket barlıq buwındaǵı hákimiyat hám basqarıw uyımları, máhálle, jaslar, hayal-qızlar, nuranıylar shólkemleri, bilimlendiriw mákemeleriniń jumısların, keń jámiyetshiliktiń turmısın qamtıp almaqta. Bul bolsa Watandı qorǵaw shın mánisinde hámmemizdiń tek ǵana wazıypamız bolıp qalmastan, sonıń menen birge, maqtanıshlı minnetimizge aylanıp baratırǵanınıń ayqın dálili» dep aytqan gáplerinde de Qurallı Kúshlerimizdiń xalıq penen hár qashanǵıdan da jakınlıǵın ańlawımız múmkin.

Búgingi kúnde dúnyanıń túrli jerlerinde quramalı keskinlikler dawam etip atırǵan jaǵdaylar, xalıqaralıq terrorizm, ekstremizm hám radikalizm qáwip-qáterleri hámmemizdi sergeklikke shaqıradı hám Qurallı Kúshlerimizden bolsa joqarı dárejedegi jawıngerlik qábiletti bekkemlewdi talap etedi. Sońǵı jıllarda mámleketimizde áskeriy-siyasiy máseleler boyınsha da túpkilikli reformalar ámelge asırılıp, milliy armiyamızdıń hár qanday qáwip-qáterlerge múnásip soqqı beretuǵın jawıngerlik qúdireti jıl sayın artıp barmaqta.

Sonday-aq, hár bir áskeriy xızmetkerdiń bilimi, tájiriybesi hám ruwxıy tayarlıǵı arttırılmaqta. Olardıń shańaraqlarına múnásip sharayatlar jaratıw maqsetinde jeńillikli kreditler tiykarında kóp qabatlı turaq jaylar, perzentlerin joqarı oqıw orınlarına mámleketlik grant tiykarında oqıwǵa qabıllaw, áskeriy qalashalardı abadanlastırıw jáne zamanagóy infrastruktura payda etiw sıyaqlı máselelerge ayrıqsha itibar qaratılmaqta.

14-yanvar kúni bolsa mámleketimizde tek ǵana áskeriy xızmetkerlerdiń emes, sonıń menen birge, barlıq watanlaslarımızdıń tınıshlıq, paraxatshılıq bayramı sıpatında keń túrde belgilenbekte.

Solay eken, Ózbekstan Respublikası Qurallı Kúshleriniń dúzilgenine 32 jıl tolıwı hám 14-yanvar – Watan qorǵawshıları kúni bayramı menen gúllán xalqımızdı qutlıqlaymız.

Elimiz tınısh, aspanımız ashıq, xalqımız abat bolsın!

Quvondiq Qodirov,

Ájiniyaz atındaǵı Nókis mámleketlik pedagogikalıq institutı rektorı wazıypasın waqıtsha atqarıwshısı.