Usı jıldıń 16-yanvar kúni belgili ilimpaz hám pidayı ustaz, mehriban insan, filologiya ilimleriniń kandidatı, docent Sapura Jumabaevna Bawatdinovanı rehimsiz sum ájel aramızdan alıp ketti.

Sapura Bawatdinova 1965-jılı 27-mart kúni Qaraqalpaqstan Respublikası Shımbay rayonında tuwılǵan. 1984-1991-jılları Nókis mámleketlik universitetin oqıp pitkergen. 1986-1988-jılları Nókis qalası 28-sanlı mektep muǵallimi, 1988-1993-jılları Shımbay rayonı 1-sanlı mektep muǵallimi, 1994-1997-jılları N.Dáwqaraev atındaǵı Til hám ádebiyat institutınıń aspirantı, 1998-2002-jılları usı ilim-izertlew institutınıń ilimiy xızmetkeri bolıp islegen.

2002-jılı «Qaraqalpaq xalıq qosıqları (XX ásirdiń 60-90-jılları) temasında kandidatlıq dissertaciyasın tabıslı qorǵap shıqqan.

2003-2007-jılları Ájiniyaz atındaǵı Nókis mámleketlik pedagogikalıq institutı pedagogika kafedrası assistent-oqıtıwshısı bolıp islegen. 2007-jıldan búgingi kúnge shekem instituttıń qaraqalpaq ádebiyatı kafedrasında úlken oqıtıwshı, soń docent lawazımında islep kelgen edi.

2000-2024-jılları 150 den aslam ilimiy maqalaları hám tezisleri ilimiy-ámeliy konferenciyalardıń ilimiy toplamlarında hám ilimiy jurnallarda járiyalandı. Onıń avtorlıǵında bir ilimiy monografiya, 2 metodikalıq qollanba hám 2 oqıw qollanba baspada járiyalanıp, joqarı oqıw orınlarında paydalanılmaqta.

Órnekli shańaraq basshısı, mehriban ana, perzentin, shákirtlerin Watanǵa sadıq insanlar etip tárbiyalaǵan ádiwli ustaz, pedagog alım Sapura Bawatdinovanıń jarqın esteligi mudamı biziń yadımızda qaladı.

Onıń shańaraq aǵzalarına, jaqınlarına, barlıq shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, Túrkiy tiller fakulteti hám jámáátlik shólkemleri.