Ájiniyaz atındaǵı Nókis mámleketlik pedagogikalıq institutında 9-dekabr – Xalıqaralıq korrupciyaǵa qarsı gúresiw kúni múnásibeti menen student-jaslar arasında birqatar tańlawlar ótkerilgen edi. Búgin usı tańlawlardıń jeńimpazları saltanatlı túrde sıylıqlandı.

Ilajda Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń baslıǵı Z.Reymova, institut rektorı wazıypasın waqıtsha atqarıwshısı Q.Qodirov hám korrupciyaǵa qarsı gúresiw «Komplaens-qadaǵalaw» sistemasın basqarıw bóliminiń baslıǵı P.Xojabekovlar bul illetke qarsı gúresiw, joqarı bilimlendiriwdi korrupciyadan awlaq tarawǵa aylandırıw baǵdarında ámelge asırılıp atırǵan jumıslar haqqında toqtalıp ótti.

Búgingi kúnde korrupciya mashqalası dúnyanıń hár bir mámleketinde ushırasatuǵın, xalıqaralıq kólemde transmilliy jınayat sıpatında keń túrde dodalanıp atırǵan máselelerdiń biri bolıp tabıladı.

Korrupciya mámleketlerdiń barlıq tarawlarına, atap aytqanda, siyasiy, ekonomikalıq, sociallıq, mádeniy baǵdarlarda ámelge asırılıp atırǵan reformalar hám mámlekettiń xalıqaralıq maydandaǵı imidji jáne investiciyalıq tartımlılıǵına keri tásir etedi.

Prezidentimiz óziniń shıǵıp sóylewlerinde usı máselege ayrıqsha toqtalıp: «Jámiyetimizde korrupciya illeti óziniń túrli kórinisleri menen rawajlanıwımızǵa tosıq bolmaqta. Bul illettiń aldın almasaq, haqıyqıy isbilermenlik hám investiciyalıq ortalıqtı jaratıp bolmaydı, ulıwma jámiyettiń hesh bir tarawı rawajlanbaydı», – dep atap ótkenligi hár birimiz ushın korrupciyaǵa qarsı gúresiwdiń qanshelli áhmiyetli ekenligin kórsetip turadı.

Elimizde korrupciyaǵa qarsı gúresiw baǵdarında keń kólemli jumıslardıń jolǵa qoyılıwı, ásirese, usı máselege baylanıslı nızamshılıqtıń jetilistirilip, hár bir tarawda komplaens-qadaǵalawdıń engiziliwi úlken nátiyjeler bermekte.

Degen menen, tarawlarda bul baǵdarda orın alıp atırǵan mashqalalar da ushırasıp turıptı. Ótken 2023-jıl dawamında korrupciyaǵa baylanıslı 252 jınayat isi qozqatılǵan bolsa, sonnan joqarı bilimlendiriw baǵdarında 6 jınayat anıqlanıp, onıń qatnasıwshıları tiyisli tártipte nızam aldında juwapkershilikke tartıldı.

Álbette, bunday jaǵdaylar korrupciyaǵa qarsı gúresiw baǵdarındaǵı nátiyjelilikti bunnan bılay da arttırıw, xalqımız, ásirese, jaslar arasında úgit-násiyat hám túsindiriw jumısların alıp barıp, jámiyetlik qadaǵalawdı kúsheytiwdi talap etedi.

Institutta ótkerilgen tańlawlar da jaslarda korrupciya haqqındaǵı túsiniklerdi payda etip, onıń aqıbetleri, keleshegi ushın zıyanlı tárepleri haqqında juwmaq shıǵarıp, átirapında júz berip atırǵan usınday jaǵdaylarǵa biypárwa bolmawına tiykar jaratıwǵa xızmet etedi.

Atap ótilgenindey, videorolikler, súwretlew óneri, shıǵarmalar hám qosıqlar jazıw sıyaqlı tańlawlarǵa ulıwma 2 mıńnan aslam dóretiwshilik jumısları kelip tústi.

Olar tarawlardıń qánigeleri hám tóreshiler quramı aǵzaları tárepinen ádil bahalanıp, jeńimpazlar, sıylı orın iyeleri anıqlandı.

Ilajda tańlawlardıń jeńimpazlarına institut rektoratı hám kásiplik awqamı komiteti tárepinen tayarlanǵan sawǵalar saltanatlı túrde tapsırıldı.

Sonıń menen birge, korrupciyaǵa qarsı gúresiw baǵdarında belsendilik kórsetip kiyatırǵan fakultet dekanatları wákilleri, professor-oqıtıwshılar, tyutorlar hám bólimlerdiń qánigeleri de xoshametlendi.

NMPI baspasóz xızmeti.