Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasına miyneti sińgen xalıq bilimlendiriw xızmetkeri, respublikamızda sambo sportınıń rawajlanıwına úlken úles qosqan nuranıy ustaz Shorabek Mustafaevtiń 80 jıllıǵına arnalǵan yubiley keshesi bolıp ótti.

Kesheni institut rektorı wazıypasın waqıtsha atqarıwshısı Q.Qodirov kiris sózi menen ashtı hám yubiley iyesin institut jámááti atınan qutlıqladı.

Ilajda instituttıń Dene mádeniyatı fakulteti professor-oqıtıwshıları, nuranıy ustaz-pedagoglar, yubiley iyesiniń shákirtleri sózge shıǵıp Shorabek Mustafaevtiń ómiri hám mámleketimiz sportı tariyxındaǵı ornı haqqında maǵlıwmatlar berdi.

Ol 1963-jılı Qaraqalpaq mámleketlik pedagogikalıq institutına oqıwǵa kirip, Ózbekstanǵa miyneti sińgen trener Aminbay Ismayılovtıń basshılıǵında milliy gúres penen shuǵıllana basladı. Keyin ala áskeriy xızmetke shaqırtılıp, ol jerde sambo sportınıń sırların meńgerip, dáslep diviziya, sońınan áskeriy garnizon birinshiliklerinde jeńimpaz boldı. 1965-jılı Moskva qalasında ótkerilgen xalıqaralıq turnirde sıylı orındı iyelep, «Sambo boyınsha sport ustalıǵına talaban», sońınan CSKA birinshiliginde «Sport ustası» dárejesin orınladı.

Áskeriy xızmetti atqarıp kelgen Shorabek Mustafaev instituttaǵı oqıwın dawam ettiriw menen birge, respublikamızda sambonı rawajlandırıwǵa bel bayladı.

Usınday pidayı xızmetleri esapqa alınıp 1967-jılı institutqa assistent-oqıtıwshı sıpatında alıp qalındı. Onıń shákirtleri arasında Dene tárbiyası fakultetiniń studenti Sansızbay Yusupov 1983-jılı Ózbekstan jasları oyınında 1-orındı, sońınan Nijniy Novgorod qalasında ótkerilgen Birinshi jaslar spartakiadasında 2-orındı iyeledi.

Shorabek Mustafaev 1985-jıldan Nókis mámleketlik universitetinde sport pánleri kafedrasınıń baslıǵı, 1988-1995-jıllar aralıǵında Dene tárbiyası fakultetiniń dekanı bolıp isledi. Usı dáwirde ol belbewli gúres boyınsha Qaraqalpaqstan saylandı komandasına basshılıq etip, burınǵı Awqam kóleminde sambo boyınsha 20 hám dzyudo boyınsha 3 sport ustaları, Ózbekstan kóleminde milliy gúres boyınsha 24 sport ustası hám 50 den aslam sport ustalıǵına talabanlardı tayarlap shıǵardı.

Onıń jaslar tárbiyasındaǵı kóp jıllıq hám nátiyjeli miyneti húkimetimiz tárepinen múnásip bahalanıp, «Ózbekstan Respublikası xalıq bilimlendiriw aǵlası» kókirek belgisi, sonday-aq, Qaraqalpaqstan Respublikasına miyneti sińgen xalıq bilimlendiriw xızmetkeri ataqları berildi.

Ilaj sońında yubiley iyesi Shorabek Mustafaev sózge shıǵıp, kórsetilip atırǵan itibar ushın institut jámáátine minnetdarshılıq bildirdi.

NMPI baspasóz xızmeti.