Ájiniyaz atındaǵı Nókis mámleketlik pedagogikalıq institutında qaraqalpaq ádebiyatınıń klassik wákili, ullı shayır babamız Ájiniyaz Qosıbay ulınıń tuwılǵanına 200 jıl tolıwına arnap ótkeriletuǵın xalıqaralıq hám respublikalıq ilajlardı shólkemlestiriw máselelerine baǵıshlanǵan jıynalıs bolıp ótti.

Xabarıńız bar, húrmetli Prezidentimizdiń baslaması menen xalqımızdıń súyikli shayırı Ájiniyazdıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgen edi.

Bıyıl respublikamızda, sonıń menen birge, xalıqaralıq kólemde shayırdıń yubileyi keń túrde belgileniwi jobalastırılmaqta.

Bul tariyxıy waqıyanı joqarı shólkemleskenlik penen ótkeriw, yubiley ilajların shólkemlestiriw boyınsha tiyisli jumıslardı belgilep alıw, sonday-aq, ilimpazlar, dóretiwshiler, aǵartıwshı oyshıllar, tarawlardıń juwapker qánigeleri hám keń jámiyetshilik wákilleriniń pikir-usınısların úyreniw maqsetinde ótkerilgen jıynalıstı institut rektorı wazıypasın waqıtsha atqarıwshısı Quvondiq Qodirov basqarıp bardı.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, filologiya ilimleriniń doktorları, professorlar – Quwanıshbay Orazımbetov hám Aytmurat Alniyazov, «Ámiwdárya» jurnalınıń bas redaktorı Xalila Dáwletnazarov, professorlar Qutlımurat Qoshanov hám Arzı Pazılov, oqıw orınlarınıń juwapkerleri, professor-oqıtıwshılar, student-jaslar hám ǵalaba xabar quralları wákilleri qatnastı.

Ájiniyaz Qosıbay ulı dúnyanı tereń hám ótkir tanıp, qaraqalpaq xalqınıń ruwxıy dúnyasınıń bayıwına úlken úles qosqan, ádebiyatımızdı tek ǵana rawajlandırıp qoymastan, qońsılas xalıqlarǵa tanıstırǵan ullı tulǵa bolıp tabıladı.

Ózi jasaǵan dáwirde feodallıq qatnasıqları húkim súrip turǵan bolsa da, onıń aqıl-oyı bir neshe ásir aldıǵa rawajlanıp, «bul dúnyanıń kórki – adam balası» ekenligi haqqında gumanistlik sheshimge kelgenligi de onıń adamgershilik pazıyletlerin kórsetip beredi.

Ol qaraqalpaq ádebiyatında lirika, epikalıq poeziyanı rawajlandırıw menen birge, aytıs janrınıń da sheber dóretiwshisi bolıp tabıladı. Onıń Qız Meńesh penen aytısı shayırlar aytısınıń eń jaqsı úlgisi esaplanadı.

Ájiniyazdıń dóretiwshiligi xalıq arasınan XX ásirdiń 30-jıllarınan baslap jıynala baslaǵan. Dáslepki shıǵarmaları 1949-jılı baspadan shıqtı. Keyingi dáwirlerde 1960-, 1961-, 1965-, 1975-, 1988-, 1994-, 2014-jıllarda shayırdıń tańlamalı shıǵarmalarınıń jıynaǵı baspada járiyalandı. Ájiniyazdıń ómiri hám dóretiwshiligi ilimpazlar N.Dáwqaraev, Q.Ayımbetov, akademikler M.Nurmuhammedov hám H.Hamidov, sonday-aq, Á.Pirnazarov, B.Qálimbetov, A.Murtazaev, K.Mámbetov, Á.Paxratdinov, K.Allambergenov hám basqalar tárepinen ilimiy tiykarda izertlendi.

Jıynalısta shayır dóretiwshiligin xalıqaralıq kólemde úgit-násiyatlaw, shıǵarmaların shet tillerine awdarıw, sonıń menen birge, dóretpeleriniń jańa qırların ashıw maqsetinde ilimiy-izertlew jumısların alıp barıw sıyaqlı máseleler boyınsha pikir-usınıslar ortaǵa taslandı.

Sonday-aq, shayırdıń yubileyi múnásibeti menen onıń maqbarasın abadanlastırıw, átirapında kóklemzarlastırıw jumısların ótkeriw, «Ájiniyaz baǵı»na jańa terek nállerin otırǵızıw arqalı onı keńeytiw, shıǵarmaların xalqımız, ásirese, jaslar arasında úgit-násiyatlaw maqsetinde tańlawlar shólkemlestiriw hám basqa da áhmiyetli ilajlar boyınsha ámelge asırılatuǵın jumıslar, wazıypalar belgilep alındı.

Ilaj instituttıń qábiletli studentleri hám «Tumaris» xalıq ansambli aǵzaları atqarıwındaǵı koncert baǵdarlaması menen dawam etti.

NMPI baspasóz xızmeti.