ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde «Áskeriy-watan súyiwshilik xanası» shólkemlestirildi

Házirgidey globallasıw hám keskin básekilik dáwirinde, dúnyanıń hár qıylı múyeshlerinde, sonıń ishinde, bizge uzaq bolmaǵan aymaqlarda júz berip atırǵan qurallı kelispewshilikler hám qarama-qarsılıqlar, jańa qáwip-qáterler aldımızǵa keshiktiriwge bolmaytuǵın wazıypalardı belgilep bermekte.

Usınday sharayatta elimiz jasların Watanǵa muhabbat, atap aytqanda, áskeriy-watan súyiwshilik, joqarı ruwxıy-etikalıq qádiriyatlar ruwxında tárbiyalaw, olardıń sanasına tınıshlıq hám tatıwlıqtı kózdiń qarashıǵınday qásterlep-saqlaw zárúrligin tereń sińdiriw, «Xalıq hám armiya – bir tán, bir jan!» degen iygilikli ideya tiykarında jaslar tárbiyasınıń áhmiyetli baǵdarların nátiyjeli túrde alıp barıw maqsetinde Ájiniyaz atındaǵı Nókis mámleketlik pedagogikalıq institutında «Áskeriy-watan súyiwshilik xanası» shólkemlestirildi.

– Hár qanday awır hám quramalı jaǵdayda Watanımızdı qorǵaw, onıń dańqın dúnyaǵa en jaydırıw sıyaqlı eń áhmiyetli túsiniklerdi, turmıslıq hám professional kónlikpelerdi ilim-bilimlendiriw, sonday-aq, milliy qádiriyatlar tiykarında jaslardıń sanasına sińdirip barıw arqalı ana Watanımızdı shın shúrekten súyetuǵın, sadıq hám jigerli jaslardı tárbiyalaw – biziń baslı maqsetimiz, – deydi instituttıń Dene mádeniyatı fakulteti dekanı Amangeldi Ótepbergenov.

Bul jerge áskeriy sharayatta paydalanılatuǵın barlıq túrdegi qural-jaraqlar, texnikalar, hár qıylı ásbap-úskenelerdiń úlgileri alıp kelingen bolıp, jaslardıń bilim hám kónlikpelerin arttırıwǵa xızmet etedi.

«Áskeriy-watan súyiwshilik xanası»nda institut studentleri menen birgelikte aymaqtaǵı jaslar qatnasıwında mártlik sabaqların turaqlı túrde shólkemlestiriw jobalastırılmaqta.

NMPI baspasóz xızmeti.