Ájiniyaz atındaǵı Nókis mámleketlik pedagogikalıq institutında «Ózbekstan – 2030» strategiyasın «Jaslar hám biznesti qollap-quwatlaw jılı»nda ámelge asırıwǵa baylanıslı mámleketlik baǵdarlama haqqında»ǵı Prezident pármanı hám onnan kelip shıǵıp ámelge asırılatuǵın jumıslardı dodalawǵa arnalǵan konferenciya shólkemlestirildi.

Ilajda institut rektorı wazıypasın waqıtsha atqarıwshısı Quvondiq Qodirov sózge shıǵıp, mámleketlik baǵdarlama sheńberinde 2024-jılǵa mólsherlengen ámeliy ilajlar rejesi hám baǵdarlar kesiminde islep shıǵılatuǵın normativlik-huqıqıy hújjetlerdiń dizimi tastıyıqlanǵanlıǵın atap ótti.

«Hár bir insanǵa óz potencialın júzege shıǵarıwı ushın múnásip sharayatlardı jaratıw», «Turaqlı ekonomikalıq ósiw arqalı xalıqtıń abadanlıǵın támiyinlew», «Suw resursların únemlew hám qorshaǵan ortalıqtı qorǵaw», «Nızam ústemligin támiyinlew, xalıq xızmetindegi mámleketlik basqarıwdı shólkemlestiriw», «Qáwipsizlik hám tınıshlıqtı súyiwshi mámleket» sıyaqlı ulıwma 5 baǵdar hám 100 maqsetti ózinde jámlegen ámeliy ilajlar rejesinde 2024-jıl dawamında ámelge asırılatuǵın wazıypalar belgilep berilgen.

Konferenciyada instituttıń ulıwma pedagogika hám psixologiya kafedrasınıń professorı Arzı Pazılov mámleketlik baǵdarlamada mektep bilimlendiriwin reformalaw hám pedagogikalıq joqarı oqıw orınları menen integraciyanı támiyinlew, Shet tilleri fakultetiniń dekanı, docent Ilyusha Dilmanov mámleketlik baǵdarlama sheńberinde joqarı bilimlendiriw sisteması oqıw procesin dúnya standartları tiykarında shólkemlestiriw hám kadrlar tayarlawdıń sapasın arttırıw, anıq hám tábiyiy pánlerdi aralıqtan oqıtıw kafedrasınıń baslıǵı, docent Polatbek Kalxanov mámleketlik baǵdarlamada jaslar arasında IT tarawın bunnan bılay da jetilistiriw, olardıń intellektual dárejesin arttırıw, tarawǵa ilimiy-innovaciyalıq joybarlardı keńnen engiziw, milliy ideya, ruwxıylıq tiykarları hám huqıq tálimi kafedrasınıń baslıǵı, docent Erkinbay Tilewov jámiyette sociallıq-ruwxıy ortalıqtıń turaqlılıǵın támiyinlew, milletler aralıq tatıwlıqtı bekkemlew máseleleri boyınsha bayanatlar jasadı.

Ilajda instituttıń basshı xızmetkerleri, professor-oqıtıwshılar hám tiyisli juwapkerler qatnasıwında mámleketlik baǵdarlama sheńberinde joqarı bilimlendiriw sistemasında, sonıń ishinde, institutta ámelge asırılatuǵın jumıslar dodalanıp, aldaǵı wazıypalar belgilep alındı.

Konferenciya kún tártibindegi máseleler boyınsha óz ara pikir almasıldı.

NMPI baspasóz xızmeti.