Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidentiniń «Pedagogikalıq bilimlendiriwdiń sapasın arttırıw hám pedagog kadrlar tayarlaytuǵın joqarı oqıw orınlarınıń jumısların bunnan bılay da rawajlandırıw ilajları haqqında»ǵı qararı sheńberinde ulıwma bilim beriw mektepleri menen birge islesiwdiń házirgi jaǵdayı hám bul baǵdarda nátiyjelilikti arttırıw máselelerine arnalǵan jıynalıs bolıp ótti.

Ilajǵa Qaraqalpaqstan Respublikası Mektepke shekemgi hám mektep bilimlendiriwi ministrligi Respublikalıq bilimlendiriw orayı direktorınıń orınbasarı Ótesin Maxambetov, Nókis qalalıq Mektepke shekemgi hám mektep bilimlendiriwi bóliminiń baslıǵı Jeńis Ótejanov, paytaxtımızdaǵı ulıwma bilim beriw mektepleriniń direktorları, fakultet dekanları, kafedra baslıqları hám professor-oqıtıwshılar qatnastı.

Jıynalısta instituttıń marketing hám studentler ámeliyatı bóliminiń baslıǵı Polat Xojaniyazov hám oqıw-metodikalıq basqarmanıń bas qánigesi Jeńis Jumamuratov Prezident qararı tiykarında pedagog kadrlar tayarlaytuǵın joqarı oqıw orınlarınıń kúndizgi tálim baǵdarlarında oqıp atırǵan 2-4-kurs studentleri ushın háptelik oqıw sabaqları «4+2» tártibinde, atap aytqanda, sabaqlardıń 4 kúni joqarı oqıw ornında, 2 kúni mektepke shekemgi hám ulıwma orta bilim beriw mákemelerinde ámeliyat ótew tártibinde alıp barılıp atırǵanlıǵı, bunıń áhmiyeti haqqında maǵlıwmatlar berdi.

Ilajda qatnasıwshılar menen birgelikte studentlerdiń «4+2» sisteması boyınsha ámeliyatın shólkemlestiriw máseleleri, mashqalaları hám abzallıqları haqqında óz ara pikir almasıp, aldaǵı birgelikte ámelge asırılatuǵın jumıslar belgilep alındı.

NMPI baspasóz xızmeti.