Usı jıldıń yanvar ayında Prezident Shavkat Mirziyoyev basshılıǵında ótkerilgen Qáwipsizlik keńesiniń keńeytilgen jıynalısında jaslar menen islesiw sistemasın jetilistiriw, sonıń ishinde, jas áwladtıń qálbi hám sanası ushın gúres kúsheyip baratırǵan házirgidey oǵada quramalı sharayatta tálim-tárbiyanıń ornı hám olar qálbinde ana Watanǵa muhabbat jáne sadıqlıq sezimlerin qáliplestiriwdiń áhmiyeti oǵada artıp baratırǵanlıǵına ayrıqsha dıqqat qaratıldı. Mámleketimiz basshısı usı máseleler boyınsha juwapkerlerge tiyisli tártipte tapsırmalar berdi.

Belgilengen tapsırma tiykarında Ájiniyaz atındaǵı Nókis mámleketlik pedagogikalıq institutı tárepinen Nókis qalasınıń «Bes tóbe» mákan puqaralar jıyınında atalıqqa alınǵan jaslar menen islesiw jumısları ámelge asırılmaqta.

Atap aytqanda, jaslardı Watan súyiwshilik ruwxında tárbiyalaw, huqıqıy sawatlılıǵın arttırıw, sociallıq jaqtan qollap-quwatlaw maqsetinde olardı kásip-ónerge oqıtıw hám bántligin támiyinlewge kómeklesiw boyınsha bir qatar ilajlar alıp barılmaqta.

Institut rektorı wazıypasın waqıtsha atqarıwshısı Quvondiq Qodirov tiyisli juwapkerler menen birgelikte usı aymaqta bolıp, atalıqqa alınǵan jaslar hám olardıń ata-anaları menen ushırastı.

Ushırasıwlar barısında mámleketimizde jaslardıń bilim alıwı, kásip-óner úyreniwi, isbilermenlik penen shuǵıllanıp, óz ideyaların ámelge asırıwı, ilimiy-izertlewler hám innovaciyalar tarawındaǵı baslamaların qollap-quwatlaw maqsetinde islenip atırǵan jumıslar hám reformalar haqqında maǵlıwmatlar berdi.

Sonıń menen birge, jaslar hám ata-analardıń pikir-usınısları tıńlanıp, mashqalaların sheshiw boyınsha tiyisli jumıslar alıp barıldı.

NMPI baspasóz xızmeti.