Ájiniyaz atındaǵı Nókis mámleketlik pedagogikalıq institutında jumıs alıp barıp atırǵan tyutorlardıń bilimi hám kónlikpelerin arttırıw maqsetinde oqıw kursları shólkemlestirildi.

Ózbekstan Respublikası Joqarı bilimlendiriw, ilim hám innovaciyalar ministrliginiń tiyisli májilis protokolında belgilengen wazıypalardan kelip shıǵıp ótkerilip atırǵan oqıw kurslarınıń dáslepki juplıq sabaǵı institut rektorı wazıypasın waqıtsha atqarıwshısı Quvondiq Qodirov tárepinen «Jańa Konstituciya hám jaslar siyasatı» teması boyınsha alıp barıldı.

Bir aylıq oqıw kursları dawamında tyutorlar Jańa Ózbekstanda bilimlendiriw tarawındaǵı reformalar, globallasıw sharayatında jaslardı Watanǵa muhabbat hám sadıqlıq, ata-babalardan miyras bolıp kiyatırǵan qádiriyatlarǵa húrmet ruwxında tárbiyalaw, milletler aralıq tatıwlıq hám keńpeyillikti, kitapqumarlıq hám ekologiyalıq mádeniyattı jaslar arasında keńnen úgit-násiyatlaw hám jaslarǵa baylanıslı mámleketlik siyasattıń basqa da áhmiyetli máseleleri boyınsha óz bilimlerin tiyisli qánigeler basshılıǵında bekkemlep baradı.

Oqıw kursları juwmaqları boyınsha tyutorlardıń iyelegen bilim hám kónlikpeleri jazba hám test formasında sınaqtan ótkeriliwi, olardıń jumıs nátiyjeliligi arnawlı bahalaw mexanizmi (KPI) boyınsha bahalanıwı jobalastırılǵan.

Oqıw kursları dawam etpekte.

NMPI baspasóz xızmeti.