Kitapqumarlıq hápteligi joqarı shólkemleskenlik penen ótkerildi
Ájiniyaz atındaǵı Nókis mámleketlik pedagogikalıq institutı málimleme-resurs orayı tárepinen IV Respublikalıq kitapqumarlıq hápteligi sheńberinde «Kitap – ómir ustazı» atamasındaǵı keshe shólkemlestirildi.
Ilajda instituttıń ilimiy isler hám innovaciyalar boyınsha prorektorı R.Eshmuratov sózge shıǵıp, barlıq qatnasıwshılardı kitapqumarlıq hápteligi menen qutlıqladı hám háptelik sheńberinde ámelge asırılatuǵın ilajlardıń ótiwinde tabıslar tiledi.
Keshede málimleme-resurs orayı xızmetkeri D.Erlepesova, qaraqalpaq ádebiyatı kafedrasınıń baslıǵı S.Qazaqbaev, qaraqalpaq tili kafedrasınıń docenti B.Yusupova, sonday-aq, oraydıń bólim baslıqları R.Amanbaeva, Z.Qaynarovalar shıǵıp sóylep, kitapqumarlıq mádeniyatın arttırıwdıń búgingi turmısımızdaǵı áhmiyeti, jaslar tárbiyasındaǵı ornı, jazıwshı hám shayırlarımızdıń dóretpelerin keleshek áwladlarǵa jetkerip beriw baǵdarında islenip atırǵan jumıslar haqqında maǵlıwmatlar berdi.
Ilajda instituttıń belsendi kitapqumar studentleri jazıwshı hám shayırlardıń shıǵarmaların kórkemlep oqıp, nama qosıqların atqardı.
Sonday-aq, háptelik sheńberinde málimleme-resurs orayında qaraqalpaq klassikalıq ádebiyatınıń kórnekli wákili Ájiniyaz Qosıbay ulınıń 200 jıllıǵına arnalǵan «Ájiniyaz Qosıbay ulı shıǵarmaları ilimiy kózqarasta» atamasında ilimpaz, alımlar hám kitapqumar studentler ushırasıwı bolıp ótti.
Ushırasıwda qaraqalpaq ádebiyatı kafedrasınıń docenti M.Esebaev, nuranıy ana N.Berdimuratova hám oray xızmetkerleri Ájiniyaz shayırdıń ómiri hám dóretiwshiligi, onıń shıǵarmalarınıń ilimiy jaqtan izertleniwine baylanıslı áhmiyetli maǵlıwmatlardı aytıp ótti.
Ilaj sońında student-jaslar Ájiniyaz qosıqlarınan úzindiler atqardı.
NMPI baspasóz xızmeti.