Ájiniyaz atındaǵı Nókis mámleketlik pedagogikalıq institutı gumanitar hám jámiyetlik pánlerdi aralıqtan oqıtıw kafedrası tárepinen «Úzliksiz bilimlendiriw sistemasında aralıqtan oqıtıwdıń integraciyası» atamasındaǵı IV Xalıqaralıq ilimiy-teoriyalıq konferenciya shólkemlestirildi.

Konferenciya kafedra professor-oqıtıwshılarınıń ilimiy-pedagogikalıq baǵdarda qolǵa kirgizgen tabısları, xalıqaralıq hám respublikalıq abıraylı jurnallarda járiyalaǵan maqalaları, baspadan shıǵarǵan monografiya, sabaqlıq, oqıw qollanbalarınıń kórgizbesi menen baslandı.

Ilajdı instituttıń ilimiy isler hám innovaciyalar boyınsha prorektorı qutlıqlaw sózi menen ashıp berdi.

Konferenciyanıń ashılıw plenar májilisine Rossiya, Túrkiya, Ázerbayjan, Qazaqstan sıyaqlı mámleketlerden, sonıń menen birge, respublikamızda jumıs alıp barıp atırǵan joqarı oqıw orınları, ilimiy-izertlew oraylarınan professorlar, alımlar, doktorantlar, izleniwshiler hám student-jaslar qatnastı.

Bilimlendiriw hám tárbiya procesindegi áhmiyetli máselelerdi birgelikte dodalaw, óz ara pikir hám tájiriybe almasıw, ilimiy-izertlew jumıslarınıń nátiyjelerin ámeliyatqa engiziw, birgelikte ámelge asırılatuǵın jumıslardı belgilep alıwdı maqset etken konferenciyada dógerek sáwbetleri, seminar-treningler shólkemlestirilip, tarawdaǵı mashqalalar hám olardıń sheshimleri boyınsha bayanatlar jasaldı.

Konferenciya gumanitar hám jámiyetlik pánler, anıq hám tábiyiy pánler, «Pitch» sekciya, sonday-aq, psixologiyalıq trening sıyaqlı sekciyalar boyınsha óz jumısın dawam etti.

NMPI baspasóz xızmeti.