ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Dúnya júzilik miynetti qorǵaw kúnine arnalǵan ilaj bolıp ótti

Ájiniyaz atındaǵı Nókis mámleketlik pedagogikalıq institutında Ózbekstan kásiplik awqamları federaciyası Qaraqalpaqstan Respublikası Keńesi baslaması menen 28-aprel – Dúnya júzilik miynetti qorǵaw kúnine arnalǵan «Klimat ózgeriwiniń miynet qáwipsizligine hám gigienasına tásiri» atamasındaǵı ilaj hám dógerek sáwbeti bolıp ótti.

Ilajǵa respublikamızda jumıs alıp barıp atırǵan barlıq mákeme hám kárxanalar, ministrlikler, shólkemler, basqarmalar, densawlıqtı saqlaw, huqıq qorǵaw, transport hám energetikalıq uyımlardan, sonday-aq, bilimlendiriw mákemeleri hám joqarı oqıw orınlarınan wákiller qatnastı.

Qatnasıwshılar dáslep hár bir mákeme hám shólkemlerdiń miynetti qorǵaw baǵdarında ámelge asırıp atırǵan jumısları, sonday-aq, jumıs procesinde texnikalıq qáwipsizlikti támiyinlewge kómeklesetuǵın ásbap-úskenelerdiń kórgizbesi menen tanıstı.

Bunnan soń ilaj qatnasıwshıları menen dógerek sáwbeti shólkemlestirildi. Onda Ózbekstan kásiplik awqamları federaciyası Qaraqalpaqstan Respublikası Keńesi baslıǵı Ulıqbek Jalmenov sózge shıǵıp, mámleketimizde miynetti qorǵaw baǵdarında xızmetkerlerge qáwipsiz miynet sharayatların jaratıw, islep shıǵarıw menen baylanıslı bolǵan baxıtsız hádiyselerdiń aldın alıw, miynette mayıp bolǵan yamasa kásip keselligine shalınǵan adamlardıń miynet etiw dárejesin belgilew hám klimat ózgeriwiniń miynet qáwipsizligine hám gigienasına keri tásir etpewi baǵdarındaǵı ámelge asırılıp atırǵan jumıslar haqqında maǵlıwmat berdi.

Dógerek sáwbeti tiyisli taraw qánigeleri menen pikir almasıwlar hám soraw-juwaplar menen dawam etti.

Ilaj sheńberinde miynetti qorǵaw hám qáwipsiz miynet sharayatların jaratıw baǵdarında jámiyetlik qadaǵalawdı shólkemlestiriw boyınsha respublikalıq tańlawınıń Qaraqalpaqstan Respublikası basqıshında jeńimpaz bolǵan bir topar mákeme hám shólkemlerge, olarda jumıs alıp barıp atırǵan kásiplik awqamı komiteti wákillerine diplom hám bahalı sawǵalar tapsırıldı.

NMPI baspasóz xızmeti.