Ájiniyaz atındaǵı Nókis mámleketlik pedagogikalıq institutı málimleme-resurs orayında IV Respublikalıq kitapqumarlıq hápteligi sheńberinde túrkmen xalqınıń ullı perzenti, belgili shayır hám oyshıl, dúnya xalıqları ádebiyatı hám mádeniyatınıń rawajlanıwına úlken úles qosqan Maqtımqulı Pıraǵıydıń 300 jıllıǵına arnalǵan «Maqtımqulı – túrkmen poeziyasınıń quyashı» atamasındaǵı ádebiy keshe shólkemlestirildi.

Keshede filologiya ilimleriniń doktorı, professor Turǵanbay Kerwenov, filologiya ilimleri boyınsha filosofiya doktorı, professor Feruza Sapaeva, filologiya ilimleriniń kandidatı, docent Esbergen Allanazarov, sonday-aq, Respublikalıq málimleme-kitapxana orayı qánigeleri shayırdıń ómiri hám dóretiwshiligi, onıń shıǵıs xalıqları ádebiyatındaǵı tutqan ornı haqqında qatnasıwshılarǵa maǵlıwmatlar berdi.

Atap ótilgenindey, danalıq sóz sheberiniń tereń gumanizm menen suwǵarılǵan dóretpeleri márt hám sabırlı, miynetkesh túrkmen xalqınıń iygilikli qádiriyatları hám ullı pazıyletlerin jırlaw, bárqulla xalıq penen dártles bolıwǵa, túrli millet hám xalıqlar arasında óz ara tatıwlıq hám awızbirshilik baylanısların bekkemlewge qaratılǵan mazmunı menen bárshemiz, ásirese, jaslarımız ushın úlgi bolıp tabıladı.

Bıyıl abıraylı xalıqaralıq shólkem – YuNESKO basshılıǵında Maqtımqulı Pıraǵıydıń tuwılǵan kúniniń 300 jıllıq qutlı yubiley sánesi dúnya kóleminde keńnen belgilenip atırǵanı da shayırdıń ádebiy miyrası dúnya sóz óneriniń ǵáziynesine aylanıp, adamzattıń ruwxıy dúnyasın joqarılatıwǵa xızmet etip kiyatırǵanınan dárek beredi.

Ózbekstan dúnyada Maqtımqulı dóretpeleri eń kóp basıp shıǵarılatuǵın hám oqılatuǵın mámleketlerden biri retinde tán alınıwı, álbette biykarǵa emes. Mámleketimizde klassik shayırdıń qosıqları hám olar tiykarında jaratılǵan qosıqlar kirip barmaǵan birde-bir shańaraq, onıń atın bilmeytuǵın birde-bir adam tabılmaydı. Maqtımqulı ásirler dawamında xalqımızdıń óz shayırına aylanǵan. Onıń qosıqları tereń filosofiyalıq mánisi, xalıqshıllıq ruwxı, joqarı kórkemligi menen baqsı hám qosıqshılarımızǵa, shayırlarımızǵa ilham baǵıshlap, bárqulla xalıq arasında jańlap, xalqımızdıń kewlinde jasap kelmekte.

Maqtımqulı óz dáwirinde Xiywadaǵı belgili Sherǵazıxan medresesinde bilim alǵanı, Áliysher Nawayıday ullı sóz sheberin ózine ustaz dep bilgeni xalqımız arasındaǵı haqıyqıy doslıqtıń ájayıp úlgisi. Maqtımqulı Xiywada oǵada kóp ustaz hám kásiplesler, dos hám ıqlasbentler tapqan, bul jerde ótkergen jılların minnetdarshılıq penen eslep, jaqsı qosıqlar jazǵanın kitapqumarlarımız jaqsı biledi.

Qaraqalpaq klassik ádebiyatınıń kórnekli wákilleri bolǵan Kúnxoja, Ájiniyaz hám Berdaqlar da Maqtımqulını ózlerine ustaz dep bilip, onıń qosıqlarınan ilham-yosh alǵan.

Ózbekstan hám Túrkmenstan arasındaǵı doslıq hám jaqsı qońsıshılıq qatnasıqları tariyxında jańa dáwir baslanǵan házirgi waqıtta Maqtımqulı Pıraǵıydıń ólmes kórkem miyrası xalıqlarımız ushın jáne de áhmiyetke iye bolmaqta. Eki tuwısqan el ushın birdey ardaqlı bolǵan shayırdıń jetik dóretpeleri mámleketimizde turaqlı túrde, iri tirajlarda baspadan shıǵarılmaqta. Tashkent hám Xiywa qalalarında shayır esteligine baǵıshlap qurılǵan estelik kompleksleri teberik ziyarat orınlarına aylanǵan.

Shayırdıń yubiley jası – 300 jıllıǵın keń túrde belgilew haqqında Ózbekstan Respublikası Prezidenti qararınıń qabıl etiliwi de bul ullı sóz sheberiniń xalıqlarımız turmısındaǵı ornı hám áhmiyetiniń ayqın dálili esaplanadı.

Ilajda instituttıń túrkmen tili hám ádebiyatı tálim baǵdarınıń studentleri Maqtımqulınıń qosıqların atqarıp, túrkmen xalqınıń milliy ayaq-oyınların qatnasıwshılar dıqqatına usındı.

Institutta orayında IV Respublikalıq kitapqumarlıq hápteligi ilajları dawam etpekte.

NMPI baspasóz xızmeti.