Ájiniyaz atındaǵı Nókis mámleketlik pedagogikalıq institutında «Anıq hám tábiyiy pánlerdiń aktual máseleleri hám aralıqtan oqıtıw múmkinshilikleri» atamasındaǵı xalıqaralıq ilimiy-teoriyalıq konferenciya bolıp ótti.

Dástúriy hám onlayn formatta ótkerilgen konferenciyanıń ashılıw plenar májilisine Rossiya, Norvegiya, Qazaqstan sıyaqlı mámleketlerdiń ilimiy-izertlew orayları, respublikamızdaǵı aldınǵı joqarı oqıw orınlarınıń professorları, belgili ilimpazlar, jas izleniwshiler, magistrantlar hám doktorantlar qatnastı.

Ilajda instituttıń ilimiy isler hám innovaciyalar boyınsha prorektorı R.Eshmuratov, anıq hám tábiyiy pánlerdi aralıqtan oqıtıw kafedrasınıń baslıǵı P.Kalxanov házirgi kúnde mámleketimizde joqarı maǵlıwmatlı kadrlar tayarlawǵa qaratılıp atırǵan itibar, bul baǵdardaǵı áhmiyetli máseleler haqqında shıǵıp sóyledi.

Konferenciyada bayanatshılar tárepinen sońǵı jıllarda dúnyada texnikalıq hám texnologiyalıq evolyuciyanıń nátiyjesinde bilimlendiriwdiń forması jańasha kóriniste rawajlanıp atırǵanı, sonıń ishinde, aralıqtan oqıtıwdıń áhmiyeti de artqanlıǵı, bunıń ózine tán ózgeshelikleri hám mashqalaları, olarǵa birgelikte sheshim tabıw usılları haqqında pikir almasıldı.

Konferenciya anıq, tábiyiy hám social-gumanitar pánler, bilimlendiriw tarawındaǵı áhmiyetli máselelerge baǵıshlanǵan sekciyalar boyınsha óz jumısın dawam ettirdi.

NMPI baspasóz xızmeti.