Jaslar búgingi kúnde hár bir tarawda belsendi bolıwǵa umtıladı. Olardıń bul umıtılıslarına durıs baǵdar berip, ómirge, keleshekke baǵdarlaw eń áhmiyetli, sonıń menen birge, juwapkershilikli is. Sonlıqtan da, sudyalardıń respublikamızdaǵı joqarı oqıw orınlarında bilim alıp atırǵan jaslar menen turaqlı ushırasıwları jolǵa qoyılǵan bolıp, bul olardıń keleshekte ómirin usı taraw menen baylanıstırıwda áhmiyetli faktor bolıp xızmet etpekte.

Qaraqalpaqstan Respublikası hákimshilik sudınıń sudyaları R.Xudaybergenova hám J.Aymaǵanbetovalar jaslardıń sud-huqıq tarawına bolǵan qızıǵıwshılıǵın arttırıw, olardı tarawdaǵı jańalıqlar menen keńnen tanıstırıw maqsetinde Ájiniyaz atındaǵı Nókis mámleketlik pedagogikalıq institutınıń student-jasları menen ushırastı.

Onda sudyalar bayanat jasap, sud qararlarınıń nızamlılıǵı hám tiykarlılıǵın tekseriw tártibi jetilistiriliwi múnásibeti menen Ózbekstan Respublikası Hákimshilik sud islerin júrgiziw haqqındaǵı kodeksine kirgizilgen ózgeris hám qosımshalar haqqında, hayal-qızlardı basım hám zorlıqtan qorǵaw, sonday-aq, mámleketimizde gender teńligin támiyinlew baǵdarında islenip atırǵan jumıslar hám olardıń nátiyjeleri jóninde keń turde maǵlıwmat berdi.

Atap ótilgenindey, sońǵı jıllarda «Jańa Ózbekstan – jańa sud» principi tiykarında xalıqtıń ádil sudlawǵa bolǵan isenimin arttırıw, ádil sudlaw imkaniyatların keńeytiw, insan qádir-qımbatı ústemligin támiyinlewge qaratılǵan reformalar ámelge asırılmaqta. Mine, usı tiykarda tarawǵa baylanıslı nızam hújjetleri qabıl etilip, insan huqıq hám máplerin qorǵaw baǵdarındaǵı nızamshılıq mexanizmleri bekkemlenbekte. Sonday-aq, jámiyetimizde hayal hám erlerdiń óz ornın tabıwı hám belgilewi ushın mámleket olarǵa teńdey sharayat hám imkaniyat jaratıp beriwi gender teńlikti támiyinlewge tiykar bolıp xızmet etetuǵınlıǵı mısallarda keltirildi.

Studentler sóz etilgen temalar dógereginde ózleriniń qızıqtırǵan sorawlarına sudyalardan tolıq juwaplar alıw múmkinshiligine iye boldı.