Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı R.Eshmuratov basshılıǵındaǵı institut delegaciyası Lincoln University College oqıw ornınıń mirát etiwine bola ámeliy sapar sheńberinde Malayziya mámleketinde bolıp turıptı.

Sapardan gózlengen baslı maqset usı joqarı oqıw ornı menen málimleme texnologiyaları, ximiya, biologiya hám inglis tili baǵdarları boyınsha qospa tálim baǵdarlamaların ashıwdan ibarat.

Institut delegaciyası aǵzaları sapar dawamında Lincoln University College oqıw ornınıń Tábiyiy pánler fakulteti, laboratoriyalar, ilimiy oraylar, inglis tili hám basqa kafedralar, bólimlerde bolıp, bul jerdegi oqıw procesi menen jaqınnan tanıstı.

Lincoln University College oqıw ornınıń prezidenti hám prorektorları menen bolıp ótken rásmiy ushırasıwda qospa tálim baǵdarlamaların ashıw, institut professor-oqıtıwshıları ushın Malayziyada stajirovka alıp barıw, sonday-aq, bul jerdegi professor-oqıtıwshılardı instituttaǵı oqıw procesine biriktiriw hám birgelikte xalıqaralıq joybarlardı ámelge asırıw máselelerin dodaladı.

Sáwbetlesiw barısında Lincoln University College oqıw ornı basshıları eki tárepleme birge islesiwdi basqıshpa-basqısh rawajlandırıp barıw boyınsha usınısların bildirdi.

Maǵlıwmat ornında atap ótiw kerek, institutta «TOP-300»likke kiretuǵın Malayziyanıń Lincoln University College oqıw ornı menen 2022-2023-oqıw jılında mektepke shekemgi bilimlendiriw baǵdarı boyınsha qospa tálim baǵdarlaması jolǵa qoyılǵan edi.

NMPI baspasóz xızmeti.