Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı Raxat Eshmuratov basshılıǵındaǵı institut delegaciyası ámeliy sapar sheńberinde Malayziyanıń Lincoln University College oqıw ornında boldı.

Sapardan gózlengen maqset «THE World University Rankings» xalıqaralıq reytingi boyınsha dúnyanıń «TOP-300»lik joqarı oqıw orınları qatarına kirgen usı oqıw ornı menen bilimlendiriw hám ilimiy-izertlewler baǵdarında birge islesiw jumıslarınıń nátiyjeliligin arttırıwdan ibarat edi.

Áhmiyetlisi, Lincoln University College oqıw ornınıń prezidenti hám prorektorları menen bolıp ótken rásmiy ushırasıw nátiyjesinde anıq hám tábiyiy pánlerdi oqıtıw metodikası (biologiya) magistratura qánigeligi, sonıń menen birge, shet tili hám ádebiyatı: inglis tili bakalavr tálim baǵdarı hám magistratura qánigeligi boyınsha qospa tálim baǵdarlamasın ashıw haqqında shártnamaǵa qol qoyıldı.

Sonıń menen birge, ushırasıwda institut professor-oqıtıwshıları ushın Malayziyada stajirovka alıp barıw, sonday-aq, bul jerdegi professor-oqıtıwshılardı instituttaǵı oqıw procesine biriktiriw hám birgelikte xalıqaralıq joybarlardı ámelge asırıw máseleleri dodalanıp, eki oqıw ornı arasında eki tárepleme birge islesiwdi basqıshpa-basqısh rawajlandırıp barıw boyınsha ámelge asırılatuǵın jumıslar belgilep alındı.

Maǵlıwmat ornında atap ótiw kerek, institutta Malayziyanıń Lincoln University College oqıw ornı menen 2022-2023-oqıw jılında mektepke shekemgi bilimlendiriw baǵdarı boyınsha qospa tálim baǵdarlaması jolǵa qoyılǵan edi.

NMPI baspasóz xızmeti.