Qabıllaw procesiniń áhmiyetli máseleleri dodalandı
Respublikamızdaǵı barlıq mámleketlik joqarı oqıw orınları qatarında Ájiniyaz atındaǵı Nókis mámleketlik pedagogikalıq institutında da 2024-2025-oqıw jılı ushın qabıllaw procesi usı jıldıń 5-iyun kúninen baslandı.
Qabıllaw procesin joqarı dárejede shólkemlestiriw, abiturientler hám olardıń ata-analarına áhmiyetli másláhátler beriw, tarawdaǵı jańalıqlar hám ózgerisler haqqında tolıq maǵlıwmat beriw maqsetinde institutta qabıllaw komissiyası hám onıń quramında másláhát jáne koll-oraylarınıń jumısı jolǵa qoyıldı. Bul oraylar hár kúni saat 09:00 den 18:00 ge shekem turaqlı jumıs alıp barmaqta.
Xabarıńız bar, Ózbekstan Respublikası Prezidentiniń 2024-jıl 24-maydaǵı «Joqarı bilimlendiriw shólkemlerine oqıwǵa qabıllaw hám mámleketlik buyırtpasın jaylastırıw sistemasın jetilistiriw haqqında»ǵı pármanına muwapıq, 2024-2025-oqıw jılınan mámleketlik joqarı hám professional bilimlendiriw mákemelerine (kásip-óner mektebi buǵan kirmeydi) qabıllaw boyınsha imtixanlar «aldın test, sońınan tańlaw» principi tiykarında bir waqıtta ótkeriledi.
Abiturientler óz tańlawına bola test sınaǵı nátiyjesinde toplaǵan balınan kelip shıǵıp, dáslep joqarı bilimlendiriwdiń bakalavriat tálim baǵdarlarına, soń professional bilimlendiriw mákemelerine oqıwǵa kiriw ushın tańlawda qatnasadı.
Mámleketlik joqarı oqıw orınları bakalavriatına qabıllaw procesi tómendegi 2 basqıshta ámelge asırıladı:
1-basqıshta abiturientler hár jılı 5-iyunnan 25-iyunǵa shekem (25-iyun kúni de) test sınaǵın tapsırıw ushın dizimnen ótedi hám test sınaǵı tapsırılatuǵın pánler kompleksi, bilimlendiriw tili hám test tapsırıw aymaǵın jáne kiriw imtixanları quramında kásiplik (dóretiwshilik) imtixanı bolsa, usı imtixandı tapsıratuǵın mámleketlik joqarı oqıw ornın tańlaydı;
– oqıwǵa qabıllaw boyınsha kiriw imtixanları iyul-avgust aylarında ótkeriledi;
2-basqıshta abiturientler test sınaqları tolıq juwmaqlanǵannan soń 15 kún dawamında joqarı oqıw ornı, bakalavriat tálim baǵdarı hám bilimlendiriw formasın tańlaydı;
2025-2026-oqıw jılı qabıllawınan pánler kompleksinde shet tili birinshi pán sıpatında belgilengen tálim baǵdarlarına qabıllaw shet tilin biliw dárejesin belgileytuǵın milliy yamasa xalıqaralıq sertifikat tiykarında ámelge asırıladı.
Barlıq mámleketlik kolledj hám texnikumlarǵa «aldın test, sońınan tańlaw» principi tiykarında qabıllawda abiturientler kolledj hám texnikumdı, kásip hám qánigelikti jáne bilimlendiriw formasın joqarı oqıw orınlarına qabıllawdıń juwmaqlawshı nátiyjesi járiyalanǵanınan soń 10 kún múddette tańlaydı.
Usı sıyaqlı jańalıqlar boyınsha institut qabıllaw komissiyası aǵzalarınıń bilim hám kónlikpelerin arttırıw maqsetinde seminar-trening shólkemlestirilip, olarǵa tarawdaǵı normativlik-huqıqıy hújjetler menen islesiw, abiturientler hám olardıń ata-analarına tiyisli jol-jobalar beriw boyınsha maǵlıwmatlar berildi.
Ilajda qabıllaw procesine baylanıslı jumıslardı belgilengen joba tiykarında ámelge asırıw, imtixanlardı ádil túrde shólkemlestiriw hám ótkeriw boyınsha tiyisli juwapkerlerge tapsırmalar berilip, aldaǵı wazıypalar dodalandı.
NMPI baspasóz xızmeti.