Ájiniyaz atındaǵı Nókis mámleketlik pedagogikalıq institutında Ózbekstan hám Qaraqalpaqstan xalıq bilimlendiriw aǵlası, belgili pedagog hám ilimpaz, pedagogika ilimleriniń kandidatı, docent Qalbay Seytmuratovtıń 70 jıllıǵına arnalǵan yubiley keshesi bolıp ótti.

Kesheni institut rektorı wazıypasın waqıtsha atqarıwshısı Quvondiq Qodirov basqarıp bardı.

Ilajda ulıwma pedagogika hám psixologiya kafedrasınıń baslıǵı, pedagogika ilimleriniń doktorı, professor Tájibay Ótebaev, Qaraqalpaqstan xalıq muǵallimi, pedagogika ilimleriniń kandidatı, professor Arzı Pazılov, pedagogika ilimleriniń kandidatı, docent Túrkmenbay Jiyemuratovlar yubiley iyesiniń ómiri hám ilimiy-pedagogikalıq jumısları haqqında bayanatlar jasadı.

Qalbay Seytmuratov 1954-jıl 15-iyunda Shımbay rayonında dúnyaǵa kelgen. Orta mektepti pitkergennen soń Nókis awıl xojalıǵı texnikumında, sońınan Tashkent mámleketlik pedagogikalıq institutında oqıdı. Bilimlendiriw tarawındaǵı miynet jolın Aqmańǵıt pedagogikalıq oqıw ornında oqıtıwshılıqtan baslaǵan bolsa, keyin ala direktor orınbasarı lawazımında, Nókis mámleketlik universitetinde juwapkerli lawazımlarda isledi.

Miynet jolı dawamında Qaraqalpaqstan Respublikası Ministrler Keńesi, Xalıq bilimlendiriw ministrligi, Respublikalıq oqıw-metodikalıq orayı, Respublikalıq xalıq bilimlendiriw xızmetkerleriniń qánigeligin jetilistiriw hám qayta tayarlaw institutı, Nókis pedagogikalıq kolledji, Qaraqalpaq mámleketlik universiteti hám Nókis mámleketlik pedagogikalıq institutında miynet etip, respublikamızdıń bilimlendiriw tarawınıń rawajlanıwına, zamanagóy pikirleytuǵın, joqarı potencialǵa iye bolǵan kadrlar tayarlaw jumıslarına óz úlesin qostı.

Házirgi waqıtta instituttıń ulıwma pedagogika hám psixologiya kafedrasınıń docenti sıpatında bolajaq pedagoglardıń tálim-tárbiyası máseleleri boyınsha óziniń kóp jıllıq tájiriybesi menen jaslarǵa ustazlıq etip kelmekte.

Ol studentlerge tereń bilim beriw menen bir qatarda ilimiy-metodikalıq jumıslardan da qol úzbeydi.

Qalbay Seytmuratovtıń avtorlıǵındaǵı «Qoraqalpoǵistonda jadidchilik harakati va S.Majitov», «Pedagogika teoriyası», «Pedagogika tariyxı», «Úzliksiz tálim pedagogikası», «Pedagogikaǵa kirisiw», «Oqıtıw teoriyası (didaktika)», «Túrkstanda jádid aǵartıwshılıǵı hám tálim-tárbiya» hám basqa da atamalardaǵı monografiya, sabaqlıq, oqıw hám oqıw-metodikalıq qollanbaları tarawdaǵı eń áhmiyetli izertlewlerge baǵıshlanǵan bahalı miynetler bolıp tabıladı.

Onıń bir qatar ilimiy maqalaları Rossiya, Polsha, Qıtay, Avstraliya sıyaqlı mámleketlerdiń abıraylı xalıqaralıq jurnallarında baspadan shıqqan.

Keshede yubiley iyesiniń kásiplesleri, shákirtleri, aǵayin-tuwısqanları, shańaraq aǵzaları qutlıqlap, alıp kelgen sawǵaların tapsırdı.

Ilaj sońında Qalbay Seytmuratov sózge shıǵıp, bunday itibar hám sıy-húrmet ushın institut rektoratına, fakultet hám kafedra jámáátine, búgingi ilaj qatnasıwshılarına tereń minnetdarshılıq bildirdi.

NMPI baspasóz xızmeti.