Ájiniyaz atındaǵı Nókis mámleketlik pedagogikalıq institutında Amerika Qurama Shtatlarınıń Ózbekstandaǵı elshixanası tárepinen ámelge asırılǵan «English Access» baǵdarlamasınıń jabılıw máresimi bolıp ótti.

Ilajda instituttıń inglis tili hám ádebiyatı kafedrasınıń docenti, «Access» baǵdarlamasınıń koordinatorı Dina Mamırbaeva sózge shıǵıp, AQSh Elshixanasınıń «Access» baǵdarlaması sheńberinde 2022-2024-jıllar dawamında «English Access Microscholarship Program – STEM» grantı tiykarında Nókis qalası hám Xojeli rayonındaǵı ulıwma bilim beriw mektepleriniń 8-9-klass oqıwshıları ushın inglis tilin úyretiw boyınsha jumıslar alıp barılǵanlıǵın atap ótti.

Sonday-aq, elshixananıń Aymaqlıq inglis tili bóliminiń (The Regional English language Office – RELO) baslıǵı Kevin MakKoy hám «The Access Microscholarship program» baǵdarlaması boyınsha koordinator járdemshisi Umida Boltaeva, «English Language Fellow Program» joybarınıń qánigesi, institutta 2023-2024-oqıw jılında studentlerge inglis tilinen sabaq ótken AQShlı oqıtıwshı Greys Kudlak, «Access» baǵdarlamasınıń koordinatorı Gózzal Ótemuratovalar institutta grant tiykarında ámelge asırılǵan jumıslarǵa joqarı baha berdi.

Ilajda oqıwshılar baǵdarlama sheńberinde ózlestirgen bilim hám kónlikpelerin hár qıylı viktorinalıq oyınlar, saxnalıq kórinisler arqalı kórsetip berdi.

Sonıń menen birge, ámelge asırılǵan jumıslar haqqında videorolikler jıynalǵanlardıń dıqqatına usınıldı.

Ilaj sońında baǵdarlama sheńberinde qatnasqan mektep oqıwshılarına sertifikatlar hám sawǵalar tapsırıldı.

NMPI baspasóz xızmeti.