30-iyun kúni paytaxtımız Nókis qalasındaǵı oraylıq amfiteatrda Jaslar kúni múnásibeti menen bayram saltanatı bolıp ótti.

Saltanatlı ilajda ózleriniń bilimi, talantı, uqıbı menen teńlesleri arasında joqarı nátiyjelerge erisip, mámleketimizdiń rawajlanıwına múnásip úles qosıp kiyatırǵan bir qatar jaslar Qaraqalpaqstan Respublikası Joqarǵı Keńesi Prezidiumınıń qararına muwapıq «Úmit ushqını» kókirek belgisi menen sıylıqlandı.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutı Túrkiy tiller fakulteti qaraqalpaq tili kafedrasınıń tayanısh doktorantı Nurlıbekova Gúlxan Medetbekovna da bar.

Esletip ótemiz, institutımız doktorantı Gúlxan Nurlıbekova qaraqalpaq tilin Internet tarmaǵında rawajlandırıw boyınsha «KarLin» joybarı sheńberinde ilimiy-ámeliy jumıslardı alıp barmaqta.

Institutımız doktorantı Gúlxan Nurlıbekovanı qolǵa kirgizgen tabısları menen institut rektoratı hám miynet jámááti atınan qutlıqlaymız.

NMPI baspasóz xızmeti.