Usı jıldıń 26-iyun – 1-iyul kúnleri aralıǵında Rossiya Federaciyası Xakasiya Respublikası Abakan qalasında dúnya xalıqlarınıń qaharmanlıq dástanları atqarıwshılarınıń qatnasıwında «Qaharmanlıq eposlarınıń keshesi» atamasındaǵı xalıqaralıq tańlaw bolıp ótti.

Xalıqaralıq tańlawǵa Qazaqstan, Qırǵızstan, Ózbekstan, sonday-aq, Rossiya Federaciyası quramına kiretuǵın Altay, Tuva, Xakasiya Respublikalarınan júzge shamalas sheber atqarıwshılar qatnastı.

Quwanıshlı tárepi, tańlawda Ájiniyaz atındaǵı Nókis mámleketlik pedagogikalıq institutı muzıkalıq tálim hám kórkem óner qánigeliginiń magistrantı, jas jıraw Dáwranbek Endirbaev ta qatnasıp, óziniń atqarıwshılıq sheberligin kórsetti.

Solay etip, institutımız magistrantı xalıqaralıq tańlawda sıylı 2-orındı iyeledi.

– Tańlawda xalqımızdıń qaharmanlıq dástanların atqarıp shıǵıp, basqa xalıqlarǵa tanıtıwǵa háreket ettim. Ustazlarım Qaraqalpaqstan xalıq jırawı Baqbergen Sırımbetov hám pedagogika ilimleriniń kandidatı Sanobar Romanovalar menen birgelikte xalıqaralıq tańlawda joqarı nátiyjelerge erisiwge háreket etip, jaqsı tayarlıqlar alıp bardıq. Bunıń ushın ustazlarımnan sheksiz minnetdarman, – deydi Dáwranbek biz benen sáwbette.

Institut rektoratı hám miynet jámááti atınan Dáwranbek Endirbaev hám onıń ustazların erisken tabısları menen qutlıqlap, aldaǵı jumıslarında tabıslar tileymiz.

NMPI baspasóz xızmeti.