2024-2025-oqıw jılında joqarı hám professional bilimlendiriw mákemelerine oqıwǵa kiriw test sınaqları 14-iyuldan baslanadı.

Test sınaqları kúnine eki smenada shólkemlestiriledi. 1-smena saat 08:00 de, 2-smena 15:00 de baslanadı. Abiturientlerden test sınaqları baslanıwınan aldın keminde bir yarım saat aldın belgilengen aymaqqa jetip keliwi talap etiledi.

Test sınaqlarında qatnasıw ushın onlayn dizimnen ótken abiturientlerge «Abiturient ruxsatnaması» my.uzbmb.uz saytı arqalı berilmekte.

Test sınaqları baslanıwına sanawlı kúnler qalǵanlıǵı sebepli abiturientlerden ózlerine tiyisli «Abiturient ruxsatnaması»n júklep alıwın hám qaǵazǵa shıǵarıp qoyıwın soraymız.

Abiturientler ruxsatnamada belgilengen mánzildegi imaratta, kórsetilgen sánede hám smenada test sınaqlarında qatnasadı. Abiturientlerge basqa aymaq, kún hám smenada test sınaqlarında qatnasıwǵa ruxsat berilmeydi.

Abiturientler test sınaǵına pasport (ID-karta) hám abiturient ruxsatnaması menen belgilengen waqıttan keshikpegen halda keliwi kerek.

Pasport nusqası yamasa basqa hújjetler menen kelgen, sonday-aq, keshigip kelgen abiturientler test sınaqlarına kirgizilmeydi!

Barlıq abiturientlerge test sınaqlarında áwmet tileymiz!

NMPI baspasóz xızmeti.