Aldın xabar bergenimizdey, usı jıldıń 9-13-iyul kúnleri aralıǵında Ájiniyaz atındaǵı Nókis mámleketlik pedagogikalıq institutında 2024-2025-oqıw jılı ushın qabıllaw procesinde bakalavriattıń ayrıqsha qábilet talap etiletuǵın tálim baǵdarlarında kásiplik (dóretiwshilik) imtixanlar bolıp ótti.

Dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ótkerilgen imtixanlardıń belgilengen talaplar tiykarında ádil hám ashıq-aydın ótiwi, abiturientlerdiń bilim hám kónlikpelerin bahalaw ushın Ózbekstannıń túrli oqıw orınlarınan, atap aytqanda, Ózbekstan-Finlyandiya pedagogikalıq institutı, Jizzaq mámleketlik pedagogikalıq universiteti, sonday-aq, Buxara hám Termiz mámleketlik pedagogikalıq institutlarınan tájiriybeli professor-oqıtıwshılar jáne qánigeler biriktirilgen edi.

Institut rektorı wazıypasın waqıtsha atqarıwshısı Quvondiq Qodirov kásiplik (dóretiwshilik) imtixanlardıń joqarı dárejede, belgilengen talaplarǵa say túrde, ádil hám ashıq-aydın ótiwine úleslerin qosqan professor-oqıtıwshılar menen ushırasıp, olarǵa ayrıqsha minnetdarshılıq bildirdi.

Óz gezeginde, atap ótilgen joqarı oqıw orınlarınan kelgen tájiriybeli professor-oqıtıwshılar imtixanlardı shólkemlestiriw jumıslarınıń joqarı dárejede bolǵanlıǵın atap ótip, kórsetilip atırǵan itibar ushın eń jaqsı tileklerin bildirdi.

Maǵlıwmat ornında atap ótiw orınlı, institutta ótkerilgen kásiplik (dóretiwshilik) imtixanlarda 800 ge shamalas abiturientler qatnasıp, óz tayarlıqları, bilim hám kónlikpelerin sınaqtan ótkerdi.

NMPI baspasóz xızmeti.