Ájiniyaz atındaǵı Nókis mámleketlik pedagogikalıq institutı óziniń 90 jıllıq tariyxına iye bolǵan, respublikamızdaǵı tuńǵısh bilimlendiriw dárgayı bolıp tabıladı.

Dáslep 1934-jılı Tórtkúl qalasında Muǵallimler tayarlaw bólimi, sońınan 1935-jılı Qaraqalpaq mámleketlik muǵallimler institutı bolıp shólkemlestirilgen bolsa, 1944-jılı Nókis qalasına kóshirilip, Qaraqalpaq mámleketlik pedagogikalıq institutı bolıp dúzilgen.

Joqarıdaǵı hújjet 1944-jılı 8-avgust kúni Qaraqalpaqstan ASSR Xalıq Komissarları Keńesiniń Nókis qalasında «Mámleketlik pedagogikalıq institutınıń ashılıwı hám Muǵallimler institutınıń on jıllıǵın bayramlaw haqqında»ǵı qararınıń nusqası bolıp esaplanadı.

Institutımızda kóplegen mámleketlik hám jámiyetlik ǵayratkerler – Ekinshi dúnya júzilik urıs qaharmanı Plis Nurpeyisov, el aǵası Qállibek Kamalov, Ózbekstan Qaharmanları Allaniyaz Óteniyazov, Ǵayratdin Xojaniyazov, Vera Pak, Tólepbergen Qayıpbergenov, Ibrayım Yusupov, akademikler Marat Nurmuhammedov, Sabır Kamalov, Jumanazar Bazarbaev, Xusniddin Xamidov, Amin Baxiyev, Abatbay Dáwletovlar hám basqa adamlar oqıp bilim alǵan.

Bul hújjet Qaraqalpaqstan Respublikası Oraylıq mámleketlik arxivi fondında saqlanbaqta.

Maǵlıwmat QR Arxiv isi basqarmasınan alındı.

©️NMPI baspasóz xızmeti.