Birneshe kún dawamında pútkil dúnya dıqqat orayında bolǵan Parij-2024 XXXIII jazǵı Olimpiya oyınları óz juwmaǵına jetti. Dúnyanıń 206 mámleketinen kelgen eń kúshli atletler qatnasıwındaǵı oyınlarda Ózbekstan delegaciyası óz tariyxındaǵı eń jaqsı nátiyjeni kórsetiwge eristi. Atletlerimiz qızǵın ruwxta ótken bellesiwler dawamında 8 altın, 2 gúmis hám 3 qola – ulıwma 13 medaldı qolǵa kirgizip, Jańa Ózbekstannıń qaharmanlarına aylandı.

Bul nátiyje menen delegaciyamız ulıwma komandalıq esapta 206 mámleket arasında 13-orındı iyeledi. Aziyada tórtinshi, sonday-aq, ǴMDA, Oraylıq Aziya regionı, Islam tileklesligi hám Túrkiy mámleketler shólkemine aǵza mámleketler arasında eń jaqsı kórsetkishke iye boldı.

Parij-2024 jazǵı Olimpiya oyınları kóplegen kórsetkishler menen sportımız tariyxına mórlenbekte. Atap aytqanda, birinshi márte hayal-qızlarımız jazǵı Olimpiya oyınlarında altın medalǵa iye boldı, boksshılarımız 5 altın medal menen ulıwma komandalıq esapta birinshi orındı iyeledi, Olimpiadalarda birinshi márte dzyudoshılarımız 3, taekvondoshılarımız bolsa 2 medaldı qolǵa kirgizdi. Sıylı orınlardı iyeley almaǵan bolsa da qalǵan qatnasıwshılarımız qızǵın bellesiwlerde mámleketimizdiń abıray-mártebesin múnásip qorǵadı. Atletlerimiz Olimpiya oyınlarında futbol, suwǵa sekiriw, oqjaydan atıw hám hayal-qızlar gúresi baǵdarlamalarında debyut isledi.

Álbette, bunday nátiyjelerdiń túp-tiykarında húrmetli Prezidentimizdiń sportqa bolǵan dıqqat-itibarı hám ǵamqorlıqları turıptı. Olimpiadaǵa tayarlıq procesinde hár bir saylandı komandamızǵa zárúr sharayatlar jaratıp berildi, sırt elli qánigeler shaqırılıp, kerekli medicinalıq-farmakologiyalıq zatlar menen óz waqtında támiyinlendi.

Ájiniyaz atındaǵı Nókis mámleketlik pedagogikalıq institutı rektoratı hám miynet jámááti pursattan paydalanıp Olimpiya oyınlarında tariyxıy nátiyjege tiykar jaratqan hám múnásip úleslerin qosqan bárshege minnetdarshılıq bildirip, xalqımızdı qızǵın qutlıqlaydı.

Jańa Ózbekstan – jańa jeńislerge qaray!