Búgin, 9-sentyabr kúni barlıq joqarı oqıw orınları qatarında Ájiniyaz atındaǵı Nókis mámleketlik pedagogikalıq institutında 2024-2025-oqıw jılınıń ashılıwına arnalǵan saltanatlı ilaj bolıp ótti.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi, Joqarı bilimlendiriw, ilim hám innovaciyalar ministrligi wákilleri, nuranıy ustazlar, institut jámááti, student-jaslar hám olardıń ata-anaları, ǵalaba xabar quralları xızmetkerleri qatnastı.

Bayram ilajın institut rektorı wazıypasın waqıtsha atqarıwshısı Quvondiq Qodirov ashıp berdi hám qatnasıwshılardı ǵárezsizligimizdiń 33 jıllıq bayramı, sonday-aq, jańa oqıw jılınıń baslanıwı menen qutlıqladı.

Atap ótilgenindey, jańa oqıw jılı qarsańında instituttıń eki mıń orınǵa mólsherlengen jańa oqıw imaratınıń paydalanıwǵa tapsırılıwı 90 jıllıq torqalı toyın belgilew aldında turǵan institut jámááti ushın, sonıń menen birge, usı oqıw dárgayına atı berilgen qaraqalpaq klassikalıq ádebiyatınıń kórnekli wákili Ájiniyaz Qosıbay ulınıń 200 jıllıǵına múnásip bayram sawǵası boldı.

Jańa oqıw imaratında zamanagóy oqıw hám lekciya auditoriyaları, eń sońǵı texnika hám texnologiyalar menen úskenelengen laboratoriyalar, IT-inkubaciya, málimleme-resurs orayları, bıyılǵı oqıw jılınan baslap barlıq joqarı oqıw orınlarında engizilip atırǵan registrator ofisi hám basqa da kóplegen imkaniyatlar jaratılǵan.

Bıyılǵı oqıw jılında instituttıń kúndizgi, sırtqı, keshki, aralıqtan oqıtıw tálim baǵdarları ushın ulıwma 2 640 orın, magistratura basqıshında 22 qánigelik ushın jámi 161 orın ajıratıldı. Ayrıqsha atap ótiw orınlı, bıyılǵı oqıw jılı ushın institutta birinshi márte aralıqtan oqıtıw forması boyınsha ózbek tili hám ádebiyatı tálim baǵdarına qabıllaw ámelge asırıldı. Sonıń menen birge, bakalavriattıń kúndizgi bilimlendiriw formasında jańadan surdopedagogika, olegofrenopedagogika, nemis tili, psixologiya, ámeliy matematika sıyaqlı tálim baǵdarlarına qabıllaw bolıp ótti. Ellikqala pedagogika fakulteti ushın bakalavriattıń 6 tálim baǵdarı boyınsha óz aldına kvota ajıratıldı. Magistraturada jańadan testologiya hám bilimlerdi bahalaw qánigeligine talabanlar qabıllandı.

– Tórtkúl rayonındaǵı 67-sanlı ulıwma bilim beriw mektebin pitkerip, pedagogikalıq instituttıń qaraqalpaq tili hám ádebiyatı tálim baǵdarına tapsırdım. Kiriw test sınaqlarında ulıwma 170 ball toplap, mámleketlik grant tiykarında oqıwǵa qabıl etildim. Elimizdegi tuńǵısh joqarı oqıw ornı esaplanǵan bul dárgayda Ózbekstan Qaharmanları, akademikler, mámleketlik hám jámiyetlik ǵayratkerler jetisip shıǵıp, xalqımızǵa xızmet etken. Men de olardıń jolın úlgi tutıp, usı oqıw ornında oqıwdı maqset etken edim. Búgin óz maqsetime eristim. Álbette, institutta bilim hám kónlikpelerimdi bunnan bılay da jetilistirip, keleshekte mámleketimizdiń bilimlendiriw tarawınıń rawajlanıwına óz úlesimdi qosıw niyetindemen, – deydi Gózzal Jaqsımuratova.

Ilajda Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, nuranıy ustaz, Ózbekstan Respublikasında xızmet kórsetken jaslar ustazı Begdulla Sultanov, institutta jumıs islep atırǵan nuranıy ustazlar, sonday-aq, bıyılǵı kiriw imtixanlarında joqarı ball toplap, studentlikke usınıs etilgen jaslar hám olardıń ata-anaları sózge shıǵıp, elimizde jaslardıń joqarı bilim alıwı, kásip-óner úyreniwi, ilim menen shuǵıllanıp, óz qábiletlerin júzege shıǵarıwı baǵdarında jaratılıp atırǵan sharayatlar ushın mámleketimiz hám húkimetimiz basshılarına, institut jámáátine minnetdarshılıq bildirdi.

Jańa oqıw jılınıń dáslepki kúni Ǵárezsizlik sabaqları menen baslandı.

NMPI baspasóz xızmeti.