Xalıqaralıq qızlar kúnine arnaldı

Ájiniyaz atındaǵı Nókis mámleketlik pedagogikalıq institutında 11-oktyabr – Xalıqaralıq qızlar kúnine arnalǵan ushırasıw bolıp ótti.

Ushırasıwǵa Qaraqalpaqstan Respublikası Ministrler Keńesi Shańaraq hám hayal-qızlar máseleleri boyınsha sekretariat baslıǵı Gúlsara Abibullaeva, institut hayal-qızlar másláhát keńesi aǵzaları, professor-oqıtıwshılar, tyutorlar hám student-qızlar qatnastı.

Ilaj institut student-qızlarınıń qol hám súwretlew óneri úlgileri, «Sıy perde» ansambli aǵzalarınıń alamoynaq duwtarda atqarǵan qosıqları, kórkem-ádebiy hám ilimiy kitaplar, sonday-aq, milliy kiyimler kórgibeleri menen baslandı.

Ushırasıwda elimizde sońǵı jıllarda hayal-qızlardıń jámiyettegi rolin arttırıw, olardıń bilim alıwı, kásip-óner sırların meńgeriwi ushın jaratılıp atırǵan imkaniyatlar haqqında maǵlıwmatlar berildi.

Ásirese, hayal-qızlardı sociallıq jaqtan qollap-quwatlaw maqsetinde «Jaslar dápteri», «Hayallar dápteri»ne kirgen shańaraqlardıń qızları ushın ayrıqsha jeńilliklerdiń engiziliwi, tólemli kontrakt pullarınıń tólep beriliwi, magistratura basqıshında oqıp atırǵan hayal-qızlardıń kontrakt tólemleriniń tolıq mámleketlik byudjet esabınan qaplanıwı hám usı sıyaqlı sharayatlardıń jaratılıp atırǵanı hayal-qızlarımızdıń turmıstaǵı hám jámiyettegi ornın arttırıwǵa xızmet etpekte.

Ushırasıwda usınday imkaniyatlardan nátiyjeli paydalanıp atırǵan instituttıń belsendi student-qızları sózge shıǵıp, mámleketimiz hám húkimetimiz basshılarına minnetdarshılıqların bildirdi.

NMPI baspasóz xızmeti.