Búgin, 12-oktyabr kúni Ájiniyaz atındaǵı Nókis mámleketlik pedagogikalıq institutında «Britaniya-Ózbekstan» jámiyeti menen birgelikte belgili britaniyalı shayır Endryu Stanilend tárepinen birinshi márte inglis tilinde basıp shıǵarılǵan hám qaraqalpaq ádebiyatına arnalǵan «Three Karakalpak Poets» («Úsh qaraqalpaq shayırı») kitabınıń prezentaciyası bolıp ótti.

Ilajǵa zamanagóy Britaniya ádebiyatınıń belgili wákili, shayır Endryu Stanilend, instituttıń Shet tilleri fakulteti professor-oqıtıwshıları hám student-jasları qatnastı.

Britaniyalı shayır qaraqalpaq ádebiyatına bolǵan qızıǵıwshılıǵı joqarı ekenligin, «Three Karakalpak Poets» («Úsh qaraqalpaq shayırı») kitabınan qaraqalpaq ádebiyatınıń kórnekli wákilleri Ájiniyaz Qosıbay ulı, Berdaq Ǵarǵabay ulı hám Ibrayım Yusupovlardıń tańlamalı qosıqları orın alǵanlıǵın málim etip, onı tayarlawda qaraqalpaqstanlı ilimpazlar, awdarmashılar, ádebiyat hám mádeniyat tarawınıń jankúyerleriniń de xızmetleri ayrıqsha bolǵanlıǵın atap ótti hám óz minnetdarshılıǵın bildirdi.

Shayır Endryu Stanilend qaraqalpaq shayırlarınıń qosıqların awdarıw procesi, dóretiwshi tulǵalardıń qosıqlarınıń óz aldına ózgeshelikleri haqqında maǵlıwmatlar berdi hám toplamnan orın alǵan qosıqlardı oqıp berdi.

Ilajda Shet tilleri fakultetiniń belsendi studentleri Ájiniyaz, Berdaq hám Ibrayım Yusupovlardıń qosıqların qaraqalpaq tilinde, sonday-aq, olardıń inglis hám rus tillerindegi awdarlamaların aytıp berdi.

Inglis tilinde basıp shıǵarılǵan kitaptıń prezentaciyası dawamında professor-oqıtıwshılar hám studentler ózlerin qızıqtırǵan sorawlarǵa juwap aldı.

Ilaj barısında Shet tilleri fakultetiniń dekanı Ilya Dilmanov elimizde qaraqalpaq klassikalıq ádebiyatınıń kórnekli wákili Ájiniyaz Qosıbay ulınıń 200 jıllıǵın xalıqaralıq kólemde joqarı shólkemleskenlik penen ótkeriwge úlken tayarlıqlar alıp barılıp atırǵanı, búgingi inglis tilinde basıp shıǵarılǵan bul kitap usı yubileyge bahalı sawǵa bolǵanlıǵın aytıp ótip, qaraqalpaq ádebiyatınıń úlgilerin dúnya xalıqlarına tanıtıwǵa kómeklesip atırǵan britaniyalı shayırǵa institut jámááti atınan minnetdarshılıq bildirdi.

NMPI baspasóz xızmeti.