Xabarıńız bar, elimiz boylap 1-fevraldan baslap jaslar arasında náshebentlik hám psixotrop zatlardıń tarqalıwınıń aldın alıw aylıǵı keń túrde ótkerilip, orınlarda hár qıylı úgit-násiyat ilajları shólkemlestirilmekte.

Ájiniyaz atındaǵı Nókis mámleketlik pedagogikalıq institutında bolıp ótken ushırasıwda Ózbekstan Respublikası Prezidenti Administraciyası janındaǵı Náshebentlik zatlardı qadaǵalaw Milliy orayınıń bas ilimiy xızmetkeri Jánibek Yusupov, Ózbekstan Respublikası Ruwxıy salamatlıq orayınıń bólim baslıǵı Jura Toirov, Qaraqalpaqstan Respublikası Ruwxıy salamatlıq orayınıń narkolog vrachı Bóribay Qayıpnazarovlar tárepinen náshebentlik hám psixotrop zatlardıń zıyanlı aqıbetleri haqqında jaslarǵa keń túrde túsinikler berildi.

Ilajda instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov shıǵıp sóylep, náshebentlik hám psixotrop zatlar mashqalası búgingi kúnniń eń global hám aktual mashqalalarınıń biri ekenligin atap ótti.

Ásirese, jaslar arasında bul illetlerdiń tarqalıwı jámiyetimiz ushın úlken qáwip tuwdıradı. Bul mashqalanıń aldın alıw hám jaslardı bul zıyanlı illetlerden saqlap qalıw ushın túsindiriw hám úgit-násiyat jumıslarınıń nátiyjeliligin arttırıwdıń áhmiyeti joqarı ekenligi ayrıqsha tilge alındı.

Náshebentlik hám psixotrop zatlardan paydalanıw tek ǵana insannıń fizikalıq salamatlıǵına keri tásirin tiygizip qoymastan, ruwxıy salamatlıǵı hám jámiyetlik turmısında da ornı tolmas joǵaltıwlarǵa alıp keledi. Náshebentlik ádetlerine berilgen jaslar oqıw, jumıs hám jeke turmısında joqarı nátiyjelerge erise almaydı, shańaraq aǵzaları hám dosları menen qarım-qatnasında mashqalalar júz berip, sociallıq izolyaciyaǵa túsip qaladı.

Bunday illetlerdiń aldın alıw ushın jaslar arasında turaqlı túrde ruwxıy-aǵartıwshılıq úgit-násiyat jumısların shólkemlestirip, jaslarǵa salamat turmıs tárizi hám náshebentlikten awlaq bolıw usılları haqqında maǵlıwmatlar berip barıw áhmiyetli esaplanadı.

Sonıń menen birge, shańaraq hám jámiyettiń rolin arttırıw, nızamshılıq hám jámiyetlik qadaǵalawdı kúsheytiw, jaslar ushın psixologiyalıq járdem kórsetiw hám reabilitaciyalıq jumıslardı jolǵa qoyıw náshebentlik hám psixotrop zatlardıń jaslar arasında tarqalıwınıń aldın alıwǵa xızmet etedi.

Ushırasıw dawamında jaslar ózlerin qızıqtırǵan sorawlarǵa qánigelerden tolıq juwaplar aldı.

Ilajda sózge shıqqanlar bul mashqalanıń aldın alıw ushın jámiyettiń barlıq qatlamları, sonıń ishinde, ata-analar, pedagog xızmetkerler, mámleketlik hám mámleketlik emes shólkemler birgelikte jumıs alıp barıwı zárúr ekenligi, tek ǵana birgeliktegi háreketler arqalı jaslardı náshebentlik hám psixotrop zatlardan qorǵaw, sonday-aq, salamat hám jetiskenliklerge tolı ómir jolın kórsetiw múmkinligin atap ótti.

NMPI baspasóz xızmeti.